VOV4.Xơ Đăng - Kơxê hâi lơ 18/7, pôa Phạm Minh Chính, Ngế pro xâm hnê ngăn Chin phuh hiăng tơdah pôa Axel van Trotsenburg, kăn xiâm pơkuâ Hngêi rak liăn lâp plâi tơnêi - WB. Ngế pro xiâm hnê ngăn tơnêi têa mơnhên tối khât tơdroăng ki kăn xiâm pơkuâ WB lăm pôu Việt Nam, ăm hlo tơrŭm cheăng rế hía rế krá, tơƀrê pơla péa pâ; tối nhên Việt Nam đi đo ngăn WB cho ngế pú ki rơkê, kong têa tơrŭm cheăng mơnhông ki kal; mơnê WB hên hơnăm hdrối nah hiăng kum liăn, tiâ mơnhên troăng hơlâ ki kân, veăng kum kơhnâ vâ Việt Nam mơnhông mơdêk cheăng kâ rêh ối pơlê pơla dêi Việt Nam.

Tơpui tơno ‘na mâu tơdroăng kong têa ê ƀă tung kơpong, pôa Axel môi tuăn khât ƀă túa tơmiât dei Ngế pro xiâm hnê ngăn ‘na túa ki châ achê ƀă lâp plâi tơnêi, krếo thế tơrŭm, mơdêk tơrŭm ƀă kong têa ê ƀă tơdroăng ki hên kơvâ cheăng, tung hiâm mơno môi hiâm mơno, loi tơngah, tơƀrê, ƀă mâu troăng hơlâ pơkâ tơtro ƀă tơdroăng ki xiâm dêi rêm kong têa vâ tŏng kum mâu tơdroăng ki dế ối trâm nôkố môi tiah pơreăng, kong prâi hơ’lêh, mâu tơdroăng gâk kring khôi hmâ, gâk kring têa ôu, gâk kring kế kâ ƀă hên ki ê, tung pơla kố, pôa Axel tối tiah kố, rơkong tơpui dêi mâu kong têa môi tiah Việt Nam ai hnoăng cheăng kal khât.

Katarina Nga tơplôu ƀă tơbleăng