VOV4.Xơ Đăng - Kơxê lơ 5/9 a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah pôa Bill Winters, kăn xiâm pơkuâ lâp plâi tơnêi Hngêi rak liăn Standard Chartered, kong têa Ănglê dế pôu, pêi cheăng a Việt Nam.

Pôa Phạm Minh Chính tối tung pơla kong têa ê ôh tá tơniăn, cheăng kâ rêh ối pơlê pơla Việt Nam tung pơla hdrối nah xuân pêi pro klêi hên mâu tơdroăng. Ngế pro xiâm hnê ngăn tơnêi têa tối tơdroăng ki hâk nhuô̆m, mơnhên tối khât mâu khu mơdró kâ, khu ki ‘no liăn pêi cheăng kong têa ê, tung mê, ai Hngêi rak liăn Standard Chartered hiăng rơtế, tŏng kum Việt Nam tung hbrâ mơdât pơreăng ƀă mơdêk ‘mâi mơnhông cheăng kâ rêh ối pơlê pơla.

Pôa Phạm Minh Chính, Ngế pro xiâm hnê ngăn Chin phuh hiăng tơdah pôa Bill Winters, kăn xiâm pơkuâ lâp plâi tơnêi Hngêi rak liăn Standard Chartered

Ngế pro xiâm hnê ngăn Chin phuh tối tơdroăng ki kơjo kum dêi Việt Nam ‘na tơ’mot liăn ƀă mâu kơxô̆ liăn cho vâ xúa mâu ivá mơdêk krá tơniăn, malối cho mơdêk ngiât, hơ’lêh kơxô̆, hơ’lêh on tơhrik tiô troăng krá ton ƀă mơdêk tơrŭm ƀă mâu kong têa ki mơnhông mơdêk, mâu tơdroăng pơkâ liăn ngân kong têa ê ƀă mâu grup pơkuâ liăn ngân tung lâp plâi tơnêi, tung mê, ai Hngêi rak liăn Standard Chartered.

Katarina Nga tơplôu ƀă tơbleăng