Rôh trâm mâ kố po tung pơla Việt Nam nếo tơkŭm po ƀlêi chiâng Hneăng hôp khu kăn lâp tơnêi têa rôh má XVI dêi Đảng ƀă Việt Nam – EU păng ‘nâng mơdêk tơrŭm cheăng tung la ngiâ tŭm têk. Ngế pro xiâm hnê ngăn tơnêi têa tối rơdêi EU ƀă mâu kong têa ki tơrŭm cheăng cho khu tơrŭm ki kal xiâm tung troăng hơlâ tơpui kâ dêi Việt Nam; tơdroăng ki mơjiâng rôh tơrŭm cheăng nếo tối kơlo loi tơngah rế hía rế hên ƀă pro ivá mơ-eăm vâ po rơdâ tơrŭm cheăng tung mâu kơvâ cheăng.

Mơnhên tối ‘na tơrŭm cheăng Việt Nam, Ngế pro xiâm hnê ngăn tơnêi têa tối hơniâp ro hlo mâu tơdroăng mơnhông tơƀrê khât klêi kơ’nâi 35 hơnăm mơjiâng tơrŭm cheăng tơpui kâ (1990–2025). Tơdroăng ki tơbleăng pêi tơƀrê Tơkêa Tê mơdró tơniăn krê Việt Nam – EU (EVFTA) hiăng gum ăm EU chiâng kong têa tơrŭm cheăng kân má 4 dêi Việt Nam, tung pơla Việt Nam cho kong têa tơrŭm cheăng tê mơdró kân má môi dêi EU tung ASEAN.

Tơrŭm cheăng tung mâu kơvâ cheăng lêng – gâk kring, kong prâi pro pơhlêh, pêi chiâk, mơjiâng luât, khoa hok – kong ngê̆, kong prâi tơnêi tơníu ƀă hên ki ê xuân dế châ po rơdâ ƀă hên tơdroăng ki ai hlâu. Ngế pro xiâm hnê ngăn tơnêi têa pơkâ thế péa pâ pơtối thăm mơnhông tơrŭm cheăng tung tơdroăng ki péa pâ pơrá ai pơxúa, tơbleăng pêi tơƀrê EVFTA, thăm mơnhông tơrŭm cheăng tê mơdró pro tơ’lêi hlâu, tơdâng tơ’mô ăm tơdroăng ki châ tơrŭm tung mâu kơchơ mơdró ƀă rak vế tơniăn pơxúa tơxâng ăm khu mơdró kâ pơla péa pâ.