VOV4.Xơ Đăng - Kơxo lơ 25/7, a Hà Nội, Khu pơkuâ cheăng Đảng kơvâ cheăng lêng tơnêi têa, Khu xiâm pơkuâ lêng tơkŭm po Hneăng hôp cheăng lêng ƀă kal kí tâi tâng khu lêng 6 khế apoăng hơnăm 2022. Pôa Phạm Minh Chính, Ngế pro xiâm hnê ngăn Chin phuh, Kăn cheăng tung Khu pơkuâ cheăng Đảng kơvâ cheăng lêng tơnêi têa veăng ƀă hnê mơhno a Hneăng hôp. Tơdrốu khế apoăng hơnăm 2022, Khu pơkuâ cheăng Đảng kơvâ cheăng lêng tơnêi têa, Khu xiâm pơkuâ lêng pơkuâ, hnê mơhno tâi tâng lêng rŭm dêi pó, môi tuăn, mơ-eăm tung tơdroăng cheăng, kêi đeăng tâi tâng mâu hnoăng cheăng, hên hnoăng cheăng  kêi đeăng tơtro, ai hnoăng cheăng kêi đeăng lĕm tro, ai hnoăng cheăng kêi đeăng rơkê.

Ngế pro xiâm hnê ngăn Chin phuh veăng Hneăng hôp cheăng lêng ƀă kal kí tâi tâng khu lêng 6 khế apoăng hơnăm 2022

‘Na hnoăng cheăng ki xiâm tơdrốu khế mơ’nui hơnăm, tâi tâng khu lêng hbrâ, ƀeăn ƀĕng ‘nâi nhên, rĕng tối hdrối, mơnhên tro tơdroăng, teăm tơdrêng tơbleăng ƀă Đảng, Tơnêi têa ai troăng tơleăng ƀlêi trâng mâu tơdroăng. Pơtối tơbleăng ăm pêi pro, po rơdâ pêi pro mâu troăng pêi ton xŏn, tơdroăng tơkêa bro, luât ‘na cheăng lêng, gâk kring; pêi pro tơtro troăng hơlâ tơrŭm cheăng lêng ƀă tơdroăng cheăng kâ – rêh ối pơlê pơla; Pêi pro krá tơniăn tơdroăng cheăng lêng a Khu xiâm, kơvâ cheăng ƀă hnê hriâm cheăng lêng, gâk kring ăm mâu ngế; Rak kơtăng troăng pơkâ pêi hbrâ rơnáu tơplâ, pơkuâ krá tơniăn a rơvâ plêng, kơpong têa kơxĭ, tơkăng kong, tung tơnêi têa, gâk kring krá tơniăn hnoăng pơkuâ, khu râ kăn pơkuâ tơnêi têa, mâu tơdroăng mơnhông mơdêk cheăng kâ têa kơxĭ.

A Sa Ly tơplôu ƀă tơbleăng