VOV4.Xơ Đăng - Tiô rơkong krếo thế dêi Kăn xiâm ƀă Chin phuh kong têa Rusi, pôa Phạm Minh Chính, Ngế pro xiâm hnê ngăn tơnêi têa hiăng veăng hôp   tơpui cheăng kâ Phương Đông tơkŭm po a pơlê kong kân (Vladivostok), kong têa Rusi tiô tơdroăng tơbleăng xup um. Tung ƀai tơbleăng, Ngế pro xiâm hnê ngăn Chin phuh tối nhên hneăng hôp ai pơxúa khât vâ mơdêk tơrŭm cheăng lâp plâi tơnêi, veăng pơtối rak tơniăn, tơrŭm ƀă mơnhông a kơpong châu Á - Thái Bình Dương ƀă tung lâp plâi tơnêi.

Ngế pro xiâm hnê ngăn Chin phuh tối Việt Nam troăng rơhlâ mơjiâng cheăng kâ tơniăn pơkuâ dêi ƀă mơ-eăm tơrŭm ƀă lâp plâi tơnêi trâu rơdâ, krá khât. ‘Na tơrŭm cheăng kâ pơla Việt Nam - Rusi, Ngế pro xiâm hnê ngăn tơnêi têa tối nhên: đi đo nhoăm tơrŭm cheăng ƀă dêi rơpó tung tŭm tơdroăng ƀă kong têa Rusi, khĕn kơdeăn khât tơrŭm cheăng kâ pơla péa pâ tung mâu hơnăm hdrối, malối, tung mâu kơvâ ‘na on tơhrik, cheăng kơmăi kơmok ƀă mâu tơdroăng cheăng ki ê.

Pôa Phạm Minh Chính,Ngế pro xiâm hnê ngăn Chin phuh veăng hôp tơpui cheăng kâ Phương Đông tiô tơdroăng tơbleăng xup um

Ngin púi vâ pơtối mơdêk tơrŭm ƀă mâu kơvâ cheăng, péa pâ ai tơmeăm khoăng rơdêi, xúa mâu rôh tơ’lêi ing tơdroăng tơbleăng kĭ tơhrâ tê mơdró tơniăn pơla Việt Nam ƀă Khu tơrŭm cheăng kâ châu Á- Âu. Ngế pro xiâm hnê ngăn Chin phuh tối Việt Nam hâk mơnê tơdroăng tơrŭm cheăng kâ, malối kơpong Viễn Đông, ƀă mâu kong têa châu Á- Thái Bình Dương, mơdêk tơrŭm cheăng ASEAN - Rusi.

Gương tơplôu ƀă tơbleăng