VOV4.Xơ Đăng - Tiô rơkong krếo thế dêi pôa Phạm Minh Chính, Ngế pro xiâm hnê ngăn Chin phuh, hâi lơ 28/9, pôa Manuel Marrero Cruz, Ngế pro xiâm hnê ngăn kong têa Kŏng hoa Cuba pơxiâm roh lăm pôu pêi cheăng Việt Nam. Roh lăm pôu pêi cheăng mơhno tơdroăng ki khŏm mơ-eăm dêi péa pâ tung pơtối mơnhông mơdêk ƀă thăm pêi pro tâ mê nếo tơrŭm cheăng, rŭm môi tuăn, môi hiâm mơno, loi tơngah dêi pó, tơrŭm tŭm têk, rŭm môi tuăn pơla Đảng, Tơnêi têa, Chin phuh ƀă Kuăn pơlê péa tơnêi têa.

Ngế pro xiâm hnê ngăn Kŏng hoa Cuba lăm pôu pêi cheăng tơnêi têa Việt Nam

Roh lăm pôu nhŏng o Việt Nam dêi Ngế pro xiâm hnê ngăn kong têa Cuba roh kố môi xôh nếo mơnhên Việt Nam ƀă Cuba kô pơtối pêi tiô troăng ton ƀă mơnhông ó rơdêi khôi túa lĕm tro, khŏm mơ-eăm djâ tơrŭm cheăng pơla péa tơnêi têa thăm prôk trâu hơngế ƀă châ tơƀrê, tung mê, tơkŭm mơdêk tơrŭm cheăng kâ, tê mơdró ƀă mơ’no liăn cheăng chôa ‘lâng to tơdâng ƀă tơrŭm kal kí lĕm tro pơla péa tơnêi têa.

VOV/Tơplôu: A Sa Ly