Tiô rơkong krếo thế dêi pôa Phạm Minh Chính, Ngế pro xiâm hnê ngăn Chin phuh, Ngế pro xiâm hnê ngăn kong têa Luxembourg pôa Xavier Bettel  pơxiâm lăm pôu Việt Nam. Kố cho rôh lăm pôu ki apoăng pa kong kơpong châu Âu dêi Ngế pro xiâm hnê ngăn kong têa Luxembourg tung hơnăm 2023, hlối cho  rôh lăm pôu Việt Nam ki apoăng dêi Ngế pro xiâm hnê ngăn kong têa Luxembourg, châ po kân krip a  Hà Nội.

Klêi mê, Péa Ngế pro xiâm hnê ngăn tơpui tơno mâu tơdroăng mơnhông mơdêk ki nếo tung tơrŭm cheăng pơla péa pâ. A rôh tơpui tơno, pôa Phạm Minh Chính tối, nhoăm khât tơdroăng tơrŭm cheăng pơla péa pâ tung hên tơdroăng cheăng ƀă Luxembourg.

Péa Ngế pro xiâm hnê ngăn tơnêi têa hiăng tơpui tâi tâng mâu tơdroăng cheăng kâ - rêh ối dêi péa tơnêi têa, ‘na tơrŭm cheăng pơla péa pâ ƀă mâu tơdroăng tung kơpong, lâp plâi tơnêi ki péa pâ rơhêng vâ ‘nâi plĕng. Péa Ngế pro xiâm hnê ngăn vâ môi tuăn mâu tơdroăng pêi pro vâ mơdêk tơrŭm cheăng tung hên tơdroăng pơla péa tơnêi têa, malối cho mơdêk tơpui tơno tơrá mâu kăn rêm râ, malối mâu kăn xiâm xuân môi tiah tơbleăng pêi tơƀrê mâu luât pơkâ pơla péa pâ xuân môi tiah mơjiâng luât tơrŭm cheăng ăm tơtro ƀă tơmeăm ki ai hlâu dêi tơrêm kong têa, tơdroăng kal vâ tơrŭm, mơnhông mơdêk péa tơnêi têa.