Tiô tối tơbleăng, tung pơla xiâm on tơhrik lâp plâi tơnêi xơpá, pêi pro tiô hnê mơhno dêi Chin phuh, mâu khu xiâm, kơvâ cheăng hiăng veăng tơmâng, malối cho Khu xiâm ngăn tê mơdró vâ rak tơniăn yă tê têa châu têa kơxăng. Tôh pêi cheăng kring tơniăn on tơhrik hiăng tơbleăng hlá mơ-éa chêh vâ tơniăn ƀă séa ngăn tơdroăng ‘na têa châu têa kơxăng tung khế 3, hnrâ chêh mâu tơdroăng  vâ pêi  ăm mâu khế pơtối. Tơbleăng a rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên pơkâ ôh tá ăm tá ai on tơhrik têa châu têa kơxăng mơhé vâ tung pơla ki lâi.

Ngế pro xiâm hnê ngăn tơnêi têa hiăng chêh kơthô ƀă krếo phôn kơ mâu kăn xiâm pơkuâ ki ai tơdjâk troh têa châu; mơdêk tơpui tơno ‘na têa châu tung pơla trâm pá; mâu khu xiâm kơvâ cheăng, hiăng pêi cheăng kơhnâ tro tiô hnoăng cheăng pêi tơná, tă xiâm tê vâ rôe; hlối pơkâ tơdrêng Pơkâ veăng ‘no hnoăng pơkuâ ngăn tơtro yă têa châu têa kơxăng. Ngế pro xiâm hnê ngăn tơnêi têa pơkâ thế hên túa tăng rôe têa châu; tơbleăng tơdrêng hlối tơdroăng ki Ngế pro xiâm hnê ngăn tơnêi têa krếo phôn tơpui tơno ƀă mâu kong têa tơrŭm môi tiah UAE, (Cô Oét) Kuwait... vâ mơdêk ai têa châu rôe, tơniăn 30% têa kơxăng têa châu ki rôe ing kong ê.

Tung pơla nôkố, Ngế pro xiâm hnê ngăn tơnêi têa krếo thế kuăn pơlê pôi tá rơxá, pôi tá xâu, pôi tá tơngôu. Tâi tâng kuăn pơlê rơtế ƀă dêi rơpó môi tuăn, tơrŭm môi hiâm mơno tơkâ luâ xơpá, ví pôi tá ai tơdroăng tơbriât tơxup dêi rơpó  lăm rôe ‘măn têa châu pro chiâng ôh tá tơniăn ăm kochơ mơdró, râk tơmeăm khoăng, kôm mơdêk yă ƀă hên ki ê. Ngế pro xiâm hnê ngăn tơnêi têa pơcháu ăm Khu xiâm ngăn tê mơdró tơkŭm tăng ‘nâi plĕng tơbleăng tơdroăng ‘măn rak têa châu; mơjiâng troăng pơkuâ ngăn dêi têa châu tơnêi têa; Khu xiâm ngăn liăn ngân ăm liăn ngân xo ing xiâm liăn hbrâ măn vâ tơniăn ‘na têa châu tơnêi têa.