Tối tơbleăng a roh hôp, teăng mâ Khu xiâm ngăn ‘na Chiâk deăng ƀă Kong prâi tối ăm ‘nâi, tung măng tĭng hiăng hluâ hiăng tơbleăng pơkâ pêi hnoăng séa ngăn, tơkŭm po mâu khu râ kăn pêi pro a kong pơlê; apoăng châ hlo, rơnêu mâu hô sơ ‘’Mơgêi ôh tá tro pơxâu phâk’’ tá hâi tơniăn tiô luât, pơkâ séa ngăn, pơxâu phak tiô tro pơkâ. ‘Na pơkuâ khu plong tuk: ai tŭm tâi tâng plong tuk ká (lối 80 rơpâu toăng tuk ká) hiăng châ kĭ, pơkuâ tơdroăng pêi cheăng ing kơno.

Tối tơdroăng kal, tơbleăng ‘na kơdo mơ-eăm hbrâ mơdât tơnăng ká xi xŏng ôh tá tro luât IUU dêi Việt Nam pơtối châ mơdêk. Mơgêi roh hôp, Ngế pro xiâm hnê ngăn tơnêi têa kheăn kơdeăn tơdroăng mơ-eăm dêi mâu Khu xiâm, kơvâ cheăng, kong pơlê hiăng pêi pro rơdêi, rak ki pơtối, đi đo, rế mơnhông kơvâ ká xi xŏng tơniăn, rế hbrâ mơdât tơnăng ká xi xŏng ôh tá tro luât.

Ngế pro xiâm hnê ngăn tơnêi têa tối ăm ‘nâi, tiô tối hdrối Khu râ kăn séa ngăn EC kô pêi cheăng a Việt Nam tung khế 3, kố cho roh séa ngăn roh má 5. Ngế pro xiâm hnê ngăn tơnêi têa tối nhên: Pơkâ ki kân má môi cho rak tơniăn mơnhông krá tơniăn kơvâ ká xi xŏng dêi Việt Nam tiô tơdroăng mơnhông mơdêk tơdjuôm tơtêk péa kơxô̆, tơdrêng amê thế tah lôi theh trĭng IUU tiô pơkâ  dêi EC. Kố rế cho tơdroăng mơnhông rĕng krá dêi tơnêi têa, rế cho inâi ki loi tơngah dêi tơnêi têa, dêi hdroâng mơngế, rế vâ pêi cheăng gum ăm tơdroăng pơxúa ki tơxâng kân dêi kuăn pơlê.