Pôa Phạm Minh Chính, Ngế pro xiâm hnê ngăn tơnêi têa pơkuâ po rôh hôp Chin phuh ƀă mâu khu xiâm, kơvâ cheăng ‘na mâu troăng hơlâ ki kal pêi pro ahdrối vâ rak vế bê tŭm tơdroăng ki vâ châ xúa on tơhrik ăm tơdroăng ki pêi cheăng kâ, tê mơdró ƀă xúa rêm hâi. Klêi kơ’nâi hmâng mâu pơchuât tối hlá mơ-éa ƀă ăm rơkong veăng tơpui tối, mơgêi rôh hôp, pôa Phạm Minh Chính tối nhên, tâi tâng ki têi mâu tíu xiâm ki mơ’no on tơhrik ing troăng on tơhrik tơnêi têa cho chiâng vâ xúa tâi tâng mâu tơdroăng ki rơhêng vâ, ôh tá tro pơtê tung hên khế.

Laga, tơdroăng ki mơ’no on tơhrik mơni kô tro pơtê ki ton ƀă ki iâ hâi sap ing nôkố troh hâi lơ 25/5, xua kong tô ó tung lâp lu.

Ngế pro xiâm hnê ngăn tơnêi têa hnê mơhno mâu troăng hơlâ pêi pro ki ahdrối ƀă pơkâ thế sap ing nôkố troh hâi lơ 25/5, ôh tá tơpâ on tơhrik ăm tơdroăng ki pêi cheăng kâ, tê mơdró ƀă xúa rêm hâi. Tiah mê, Grup pơkuâ Kơchâ – Kế tơmeăm khoăng Việt Nam ƀă Kŏng ti xiâm Đông Bắc pơtroh tŭm kơchâ ăm mâu hngêi kơmăi on tơhrik xúa kơchâ tung tơnêi têa; xúa tâi on tơhrik; po rôh tơpui tơno tiô yă pơtân riân ƀă mâu tơdroăng tơkêa on tơhrik khía, on tơhrik tô mâ hâi hiăng bro klêi mơjiâng bro ƀă mơni kô mơ’no tơhrik tơdrêng hlối a troăng on tơhrik tơnêi têa.