Pôa Phạm Minh Chính, Ngế pro xiâm hnê ngăn Chin phuh nếo kĭ Hlá Mơ-éa ‘na tơdroăng pêi pro mâu troăng hơlâ rak vế tơniăn ‘no on tơhrik rơnó tô hơnăm 2023 tung la ngiâ. Tung mê, Ngế pro xiâm hnê ngăn tơnêi têa pơkâ thế Grup pơkuâ On tơhrik Việt Nam: Tơkŭm mơhnhôk tơƀrê mâu kơxô̆ liăn, ivá mơ-eăm khât tung hnê mơhno pơkuâ pêi pro tơdâng tơ’mô, rak tơƀrê mâu troăng hơlâ rak vế ‘no on tơhrik; tơkŭm pêi pro kơtăng tiô pơkâ ƀă tiô mâu tơdroăng ki hnê mơhno dêi Ngế pro xiâm hnê ngăn Chin phuh, hnê mơhno dêi Khu xiâm ngăn Kơmăi kơmok ƀă tê mơdró ‘na tơdroăng kố.

Hbrâ rơnáu chêh bro mâu hlá mơ-éa rơkê hbrâ ví ƀă mâu tơdroăng ki xơpá ‘na ‘no on tơhrik ƀă tiô hnê mơhno dêi Khu xiâm ngăn kơmăi kơmok ƀă tê mơdró; tơdrêng amê hlối pơkuâ, tơrŭm ƀă mâu khu xiâm, kơvâ cheăng kong pơlê tơkŭm pêi pro tiô pơkâ. Tơkŭm pêi pro tơƀrê mâu troăng hơlâ ‘na pơkâ thế kơtăng xúa on tơhrik malối cho tung khế 6 hơnăm 2023.