A rôh hôp, mâu kăn hiăng ăm rơkong veăng tơpui tối 'na mâu tơdroăng tơkêa bro luât, tơdroăng pơkâ: Luât tơnêi tơníu ('mâi hơ'lêh); Luât hngêi ối ('mâi hơ'lêh); Luât tê mơdró tơnêi tơníu ('mâi hơ'lêh); Luât liăn ngân tơnêi têa ('mâi hơ'lêh); Luât 'mâi hơ'lêh, tơ'nôm mâu tơdroăng dêi Luât 'no liăn cheăng; Luât pêi pro tơdâng tơ'mô a pơlê pơla ('mâi hơ'lêh).

Pôa Lê Minh Hưng pơkâ thế rĕng pê klêi tâi tâng hồ sơ dêi mâu tơdroăng tơkêa bro luât, tơdroăng pơkâ ƀă tối nhên pơkâ pêi troh tá tui lui cho thế mơhnhôk ƀă xúa châ tơƀrê mâu kơxô̆ liăn; rak vế hnoăng, ki pơxúa tro luât dêi kuăn pơlê, khu mơdró kâ; mơdêk tơƀrê, châ tơƀrê pơkuâ tơnêi têa. Xuân a rôh hôp, Ngế pro xiâm hnê ngăn tơnêi têa tối rơdêi pơtối hnê mơhno, mơdêk 'no liăn cheăng tơnêi têa, tah lôi mâu tơdroăng pá puât tơvâ tơvân vâ djâ mâu tơdroăng tơkêa bro ki u ối, ki ton mot pêi cheăng.

Rơtế amê, pơtối rak tơniăn cheăng kâ kân, séa ngăn liăn ôh tá kơnâ yă, rak tơniăn mâu tơdroăng tơdâng tơ'mô kân. Khu xiâm ngăn hnê hriâm ƀă hnê mơjiâng tuăn ngôa rơkê thế tơleăng mơnhên, klêi tơdroăng ôh tá ai tŭm hlá mơ-éa hriâm, tơniăn ki dâi lĕm ƀă tơniăn krúa kế kâ tung mâu hngêi trung hriâm.