VOV4.Xơ Đăng - Kơxo lơ 22/7, pôa Phạm Minh Chính, Ngế pro xiâm hnê ngăn tơnêi têa pin tơdah pôa Maeda Tadashi, Kăn hnê ngăn Hô̆i đong quản trị Hngêi rak liăn Tơrŭm cheăng lâp plâi tơnêi Nhuk JBIC. A rôh tơdah, Ngế pro xiâm hnê ngăn tơnêi têa tối, Việt Nam đi đo ngăn Nhuk cho tơrŭm cheăng ki kal má môi, ton ta ah, môi tuăn ƀă Nhuk veăng ‘no hnoăng ăm tơdroăng hơniâp lĕm, tơrŭm tơ-rôa ƀă mơnhông mơdêk kơpong ƀă lâp plâi tơnêi, djâ tơdroăng tơrŭm pơla péa tơnêi têa pơxiâm mot tung mâu hơnăm mơnhông nếo pêi pro mâu tơdroăng cheăng vâ troh lêh tơbâ 50 hơnăm mơjiâng tơrŭm tơpui kâ a hơnăm 2023.

Ngế pro xiâm hnê ngăn tơnêi têa tối nhên, môi tung mâu tơdroăng pêi pro ahdrối dêi péa tơnêi têa cho mơnhông tơrŭm cheăng kâ, séa ngăn liăn ôh tá kơnâ, ‘mâi pơ’lêh tơniăn tơdroăng ‘no liăn cheăng tê mơdró... Tung la ngiâ,  ing tơdroăng “ ‘nâi pâ, tơdrăng, loi nhoăm, pêi tơ-brê”, Ngế pro xiâm hnê ngăn tơnêi têa pơkâ thế Nhuk ƀă JBIC pơtối mơ-eăm ti tăng ‘nâi plĕng, hnê tối ‘na luât tŏng kum ƀă Chin phuh ƀă Kuô̆k hô̆i Nhuk; Pơtối tơpui tơno ƀă tơrŭm krá ƀă mâu kơ koan dêi Việt Nam vâ tăng troăng tơrŭm cheăng tơ-brê, mơnhông mơdêk tâ nếo tơrŭm cheăng trâu rơdâ pơla Việt Nam - Nhuk tung mâu hơnăm la ngiâ.

Gương tơplôu ƀă tơbleăng