Drêng tơbâ 94 hơnăm hâi mơjiâng Đoân Droh rơtăm Kŏng san Hồ Chí Minh (26/3), Pôa Phạm Minh Chính, Ngế pro xiâm hnê ngăn tơnêi têa nếo ai rôh trâm mâ, tơpui tơno ƀă droh rơtăm ƀă inâi “Droh rơtăm Việt Nam djâ troăng ahdrối mơjiâng khoa hok kŏng ngê̆, pơhlêh nếo tơmiât pêi rơkê ƀă pơhlêh kơxô̆ tơnêi têa”.

A rôh tơpui tơno, pôa Phạm Minh Chính, Ngế pro xiâm hnê ngăn tơnêi têa ƀă kăn pơkuâ mâu khu xiâm kơvâ cheăng hiăng tiâ mơnhên mâu rơkong kơ-êng dêi droh rơtăm ‘na hên kơvâ cheăng ki kal, mê cho: pơxiâm pêi cheăng tơmiât pêi rơkê; mơjiâng khoa hok; mơjiâng mâu ngế cheăng ki rơkê plĕng, malối cho tung mâu kơvâ cheăng kong ngê̆; troăng hơlâ tơ’mot ƀă râng chêng mâu ngế ki rơkê.

Ngế pro xiâm hnê ngăn tơnêi têa pơkâ thế Droh rơtăm Việt Nam mơdêk hiâm mơno djâ troăng ahdrối, tơmiât pêi rơkê ƀă “5 ki hbrâ rơnáu” tung mơjiâng khoa hok kong ngê̆, pơhlêh nếo tơmiât pêi rơkê ƀă pơhlêh kơxô̆ tơnêi têa; Hbrâ rơnáu tung hriâm tâp, hriăn plĕng khoa hok, xúa kong ngê̆, pơhlêh kơxô̆; Hbrâ rơnáu veăng pêi pro klêi troăng pơkâ, pơhlêh tơdroăng ki ‘no liăn cheăng tê mơdró. Hbrâ rơnáu tung pơkuâ ngăn ki rơkê plĕng ƀă mơnhông tơƀrê tơdroăng cheăng; Hbrâ rơnáu tung pơxiâm pêi cheăng, pơhlêh nếo tơmiât pêi rơkê; pơhlêh kơxô̆; Hbrâ rơnáu tung trâm mâ tơpui tơno, tơrŭm ƀă lâp plâi tơnêi.