Tiô rơkong krếo thế dêi pôa Lương Cường, Kăn xiâm hnê ngăn tơnêi têa ƀă kơdrâi pôa, pôa Philippe, Pơtáu kong têa Ƀih ƀă Kơdrâi pơtáu lăm pôu râ kăn xiâm Tơnêi têa Việt Nam sap ing hâi lơ 31/3 – 04/4/2025. Kơxo lơ 1 khế 4, klêi Leh tơdah râ Tơnêi têa châ tơkŭm po kân krip a Tíu pêi cheăng Kăn xiâm hnê ngăn tơnêi têa, pôa Lương Cường, Kăn xiâm hnê ngăn tơnêi têa ƀă pơtáu kong têa Ƀih cho pôa Philippe hiăng ai roh trâm mâ tơpui tơno.

A roh trâm mâ tơpui tơno, pôa Lương Cường, Kăn xiâm hnê ngăn tơnêi têa mơnhên Việt Nam đi đo nhuô̆m ƀă pói vâ thăm tơrŭm hên pâ ƀă kong têa Ƀih, kong têa ki tơrŭm ai hnoăng ƀă rơkong tơpui ki kal tung EU; tối tơdroăng ki nhuô̆m tơdroăng tŏng gum kơnâ dêi kuăn pơlê Ƀih ‘măn ăm Việt Nam tung tơdroăng tơplâ vâ châ tơniăn krê hdroâng mơngế hdrối nah, xuân môi tiah mâu tơdroăng tuăn pâ lĕm ƀă veăng kum dêi ngế krê Pơtáu ƀă Kơdrâi pơtáu Ƀih ăm tơnêi têa, kuăn pơlê Việt Nam ƀă tơrŭm péa tơnêi têa tung pơla kố nah.

Péa kăn xiâm pơkuâ hiăng tơpui tơno ‘na mâu troăng tơrŭm  cheăng kân pơla péa tơnêi têa vâ djâ tơrŭm cheăng pơla péa tơnêi têa, tiô khôi vâi krâ nah Việt Nam - Ƀih prôk trâu hơngế, păng ‘nâng, châ tơƀrê, tá thăm trâm mâ ƀă tơpui tơno mâu râ, ki má lối cho khu râ kăn xiâm, tung tâi tâng ƀâng Đảng, Tơnêi têa, Chin phuh, Kuô̆k hô̆i; pơtối pêi pro châ tơƀrê mâu troăng tơrŭm cheăng pơla péa pâ ki dế ai nôkố ƀă hriăn plĕng mơjiâng mâu troăng tơrŭm cheăng nếo vâ pro trâu hơngế tơrŭm cheăng pơla péa tơnêi têa.