Kơxê hnah (22/09) a Tíu pêi cheăng Chin phuh, pôa Lê Minh Hưng, Ngế pro xiâm hnê ngăn tơnêi têa pơkuâ hneăng hôp ƀă Khu xiâm mơjiâng tơmeăm khoăng ƀă mâu khu xiâm kơvâ cheăng ki ai tơdjâk troh vâ séa ngăn, mơhnhôk tơdroăng tơbleăng ƀă mơ'no liăn cheăng ƀă mâu tơmeăm khoăng, tơdroăng tơkêa bro ki kal tơnêi têa ối tung kơvâ troăng prôk. Tơpui a rôh pêi cheăng, pôa Lê Minh Hưng, Ngế pro xiâm hnê ngăn tơnêi têa tối nhên, tâi tâng kơxô̆ liăn 'no mơjiâng tơmeăm khoăng tối tơbleăng ăm mâu tơdroăng tơkêa bro troăng prôk ki kal tung hơnăm 2026 cho hên, châ lối 250.000 rơtal liăn.

Kố cho kơxô̆ liăn ki kal châ tơbleăng rak tơniăn ki dâi lĕm ƀă tơdroăng pêi pro vâ mơdêk mơnhông cheăng kâ - rêh ối pơlê pơla, veăng kum tơƀrê tung pơkâ pêi mơdêk péa kơxô̆, kơxô̆ liăn 'no pêi cheăng tơƀrê ƀă pro xiâm ki krá tơniăn ăm mơnhông cheăng kâ rêh ối pơlê pơla plâ hneăng. Tung pơla hâi khế ki u ối dêi hơnăm 2026 bu ối pái khế, Ngế pro xiâm hnê ngăn tơnêi têa pơkâ thế Khu xiâm mơjiâng tơmeăm khoăng, Khu xiâm pơkuâ liăn ngân rơtế ƀă mâu kong pơlê athế mơ-eăm khât, tơkŭm ivá vâ pêi châ tơdroăng pơkâ mơ'no 100% kơxô̆ liăn hiăng pơcháu.