Pơla hdrối kố nah, tơpui a rôh pêi cheăng ƀă kăn pơkuâ Pơlê kong kân Hà Nội, pôa Phạm Minh Chính, Ngế pro xiâm hnê ngăn Chin phuh pơkâ  thế pơlê kong kân Hà Nội kal mơdêk tâ nếo hiâm mơno mơ-eăm, khên tơmiât, khên pêi. Tối tơbleăng a rôh pêi cheăng ăm hlo, 4 khế apoăng hơnăm 2023 tâi tâng kơxô̆ liăn ngân a pơlê kong kân vâ chê 178 rơpâu rơtal liăn, châ lối 50 tơdroăng pơkâ, tâk 21,6% tâng pơchông ƀă khế kố hơnăm nah.

Hà Nội ối má 2 tung lâp tơnêi têa ‘na tơ’mot FDI ƀă lối 7 rơpâu tơdroăng tơkêa ối xêt khât ƀă kơxô̆ liăn ‘no 61,7 rơtal dollars. Tơpui mơgêi rôh pêi cheăng, pôa Phạm Minh Chính, Ngế pro xiâm hnê ngăn Chin phuh pơkâ thế tung la ngiâ, Pơlê kong kân pơtối pơkâ kơtăng, pêi pro hơ’lêh Pơkâ Hneăng hôp kân 13 dêi Đảng, tơbleăng mâu tơdroăng mơgêi dêi Khu xiâm pơkuâ tơdroăng kal kí ‘na mơnhông kơpong Tơbăng kroăng Hồng, Pơlê kong xiâm Hà Nội. Mơdêk rơdêi hiâm mơno mơ-eăm, tơrŭm, kơhnâ, tơmiât rơkê, mơhnhôk tơƀrê mâu tơdroăng ‘no liăn cheăng.

Pro pơhlêh ki ôh tá ai chiâng ai, pơhlêh tơdroăng ki xơpá chiâng tơ’lêi, pơhlêh tơdroăng ki ôh tá tơƀrê chiâng tơƀrê; xúa tơƀrê mâu tơdroăng ki ai hlâu, ki pơxúa, rôh tơ’lêi, mơ-eăm rơdêi ƀă ivá dêi tơná.