Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng, kong pơlê kơhnâ pêi pro, hbrâ rơnáu, rơkê plĕng, pêi tơƀrê tâ nếo tung tơbleăng tơdroăng cheăng pêi, tŏng gum mâu tơdroăng tơvâ tơvân, tung tơdroăng ki pêi pro kơtăng tiô tơdroăng hnê mơhno dêi Khu xiâm ngăn cheăng kal kí, Kuô̆k hô̆i, Chin phuh.

Tung mê, pêi pro klêi mâu tơdroăng pơkâ pêi, túa pêi, ngăn tung tơdroăng ki pơkâ pêi, tro dêi lâp plâi tơnêi la tơtro ƀă tơdroăng krê dêi Việt Nam vâ ai tơdroăng tơbleăng tơdâng tơ’mô, môi tuăn tung lâp tơnêi têa. Chêh pro klêi hlá mơ-éa ‘no liăn pêi cheăng, xoăng liăn châ tiô tơdroăng púi vâ, tơdroăng pro troăng, tơdrêng amê hlối pêi pro kơtăng tơdroăng ki hbrâ mơdât kâ kơluâ, kâ kơhveăm liăn ngân, pro ai pơxúa ăm dêi khu.

Ngế pro xiâm hnê ngăn tơnêi têa pơkâ thế mâu kong pơlê tơkŭm hnê mơhno tơdroăng ki xo tơnêi, xoăng tíu pro pơlê, rak vế rĕng, teăm pêi pro tơdrêng, tơdroăng rêh ối kuăn pơlê a tíu ối nếo lĕm tro tâ tíu ối ki ton, rak tơniăn ai tŭm troăng prôk, tŏng gum tơdroăng cheăng pêi, túa rêh kâ ối ăm kuăn pơlê. Ngế pro xiâm hnê ngăn tơnêi têa pơcháu ăm Khu xiâm ngăn liăn ngân rĕng séa ngăn, pơtroh kĭ tơdroăng tơkêa vêh pơkâ ăm Kŏng ti troăng rơxế lơ treng Việt Nam; Khu xiâm ngăn kơmăi kơmok ƀă tê mơdró chêh pro klêi hlá mơ-éa vâ pơtroh kĭ tơkêa pro troăng rơxế lơ treng tung khế 3 hơnăm 2026, tơdrêng amê hlối pơtối pơkâ mơ’no troăng hơlâ tŏng gum ƀă râ ki ai hnoăng pơkuâ.