VOV4.Xơ Đăng - Hâi lơ 21/8, pôa Phạm Minh Chính, Ngế pro xiâm hnê ngăn tơnêi têa pơkuâ hneăng hôp tung lâp tơnêi têa ‘’ ‘Na mơdêk hnoăng cheăng rak ngăn ivá kuăn pơlê; Hbrâ veăng ‘mâi mơnhông, rĕng, mơnhông mơdêk krá tơniăn’’. Hneăng hôp pêi tơ-brê tơdroăng hôp tơdrêng a tíu pêi cheăng dêi Khu xiâm ngăn pơkeăng pơlât ƀă tíu mơ'no a Hneăng hôp, Ngế pro xiâm hnê ngăn tơnêi têa pơkâ thế mâu kăn ƀô̆, mâu ngế pêi cheăng khăm pơlât tung kong pơlê pơtối rak vế pêi pro tơdroăng cheăng ki pơxúa, pê klêi tơ-brê mâu troăng rơhlâ, troăng dêi Đảng, luât pơkâ dêi tơnêi têa, malối cho mâu pơkâ 20, 21 ‘na rak vế tơniăn, rak ngăn, mơdêk ivá kuăn pơlê ƀă tơdroăng ‘na kơxô̆ pơ’leăng mâ mơngế tung tơdroăng cheăng nếo nôkố.

Ngế pro xiâm hnê ngăn tơnêi têa pơkuâ hneăng hôp mơ’no tơdrêng tung lâp tơnêi têa ‘na “mơdêk tơdroăng rak ngăn ivá kuăn pơlê”

Ngế pro xiâm hnê ngăn tơnêi têa tối nhên, tơdroăng rak vế ivá kuăn pơlê cho xiâm dêi kơvâ cheăng la kố xuân cho hnoăng cheăng pêi tơchoâm dêi tơdroăng kal kí. Mâu khu xiâm kơvâ cheăng, kơ koan kal mơdêk tơrŭm krá ƀă Khu xiâm ngăn pơkeăng pơlât, ki hdrối cho tơleăng mơnhên mâu tơdroăng môi tiah rôe tơmeăm, tăng khu ‘no liăn mơjiâng pro, nâp liăn khăm pơlât ƀaoh hiêm khăm pơlât, tơdroăng tŏng kum ƀă mâu kăn ƀô̆, mâu ngế pêi cheăng kơvâ ngăn pơkeăng pơlât.

Gương tơplôu ƀă tơbleăng