Kơxo lơ 4/7, pôa Phạm Minh Chính, Ngế pro xiâm hnê ngăn tơnêi têa hiăng pơkuâ po Rôh hôp ‘no tơdrêng ing troăng hyôh Internet Chin phuh ƀă mâu kong pơlê ƀă rôh hôp Chin phuh tiah hmâ khế 6. Tơpui a Rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên, tung pơla xơpá, mâu khu râ, pơkuâ cheăng, kong pơlê hiăng mơ-eăm tơkâ luâ, tơbleăng kơtăng, tơdâng tơ’mô, ai troăng hơlâ, ai tơdroăng ki kal mâu hnoăng cheăng, troăng hơlâ pơkâ mơ’no.

Tung mê, hiăng tơkŭm tung mâu hnoăng cheăng ki kal kal pêi pro tơdrêng nôkố cho tŏng kum mâu tơdroăng ki xơpá ăm khu mơdró kâ tăng cheăng pêi ăm kuăn pơlê, thăm mơdêk, rak vế tơniăn mâu tơdroăng ki rak tơdâng tơ’mô, tơniăn cheăng kâ kân, rak vế ‘na gak kring pơlê pơla cheăm bêng. Ngế pro xiâm hnê ngăn Chin phuh xuân pơkâ thế mâu kăn ki veăng hôp a rôh hôp tơkŭm tơpui ‘na tơdroăng cheăng kâ rêh ối pơlê pơla khế 6, hneăng má II ƀă 6 khế apoăng hơnăm.

Tung mê tối nhên mâu tơdroăng ki pêi pro tơƀrê, mâu tơdroăng ki tá hâi pêi pro klêi kal ‘mâi rơnêu, ƀai hriâm ki rơkê; tơpui tối leăng ‘na tơdroăng; pơkâ mơ’no troăng hơlâ ki kal, ki xiâm, tơdroăng ki kal pêi pro mâu hnoăng cheăng khế 7 ƀă 6 khế mơ’nui hơnăm 2023.