Kơxê lơ 30/5, pôa Phạm Minh Chính, Ngế pro xiâm hnê ngăn tơnêi têa troh lăm pôu ƀă diâp kơxuô tơmeăm ăm mâu vâi o hok tro Tíu xiâm tŏng kum mơnhông hnê hriâm khên tơnôu mot rêh ối tung pơlê pơla ối tung Hngêi trung Cao đẳng sư phạm Trung ương ƀă Hngêi trung phôh thong yân lâp Hermann Gmeiner Hà Nội. A roh trâm mâ, Ngế pro xiâm hnê ngăn tơnêi têa pơkâ, pơtối pêi pro châ tơƀrê mâu troăng pơkâ pêi, troăng hơlâ hnê hriâm, gâk kring ƀă rak ngăn vâi hdrêng tối tơdjuôm, hnê hriâm vâi hdrêng chó chêng tơvê kŏng tối krê.

Tung mê, tơkŭm tơleăng tơdroăng ôh tá bê tíu hnê hriâm, ki má lối a mâu pơlê kong kân, kơpong hngêi kơmăi kơmok. Thế nhuô̆m hok tro, ôh tá pơrah, hdjăm dría, thế nhuô̆m tơdâng tơ’mô dêi kuăn mơngế, ing mê nếo kâi mơdât tơdroăng pro pơlăm pơlối, pâm xiăn ƀă vâi hdrêng, nếo ôh tá ai tơdroăng thái cô ai mâu tơdroăng ki ôh tá tro ƀă vâi hdrêng.

Ngế pro xiâm hnê ngăn tơnêi têa pơkâ kal thăm pêi pro rơdêi po rơdâ châ tơƀrê mâu troăng pơkâ pêi, troăng hơlâ ‘na mơngế chó chêng tơvê kŏng, tung mê, ai vâi hdrêng chó chêng tơvê kŏng, hok tro chó chêng tơvê kŏng.