VOV4.Xơ Đăng - Hâi lơ 18/9, pôa Phạm Minh Chính, Ngế pro xiâm hnê  ngăn Chin phuh ƀă khu kăn pêi cheăng hiăng séa ngăn a tíu mơjiâng pro, tí tăng ngăn, hnê tối ‘na tơdroăng mơjiâng pro 3 to hngêi pơkeăng kân tung kong pơlê Hà Nam, mê cho  2 toăng hngêi pơkeăng Lão Khoa, Tíu khăm pơlât má 2 dêi Hngêi pơkeăng Việt Đức ƀă tíu pêi cheăng khăm pơlât má 2 dêi hngêi pơkeăng Bạch Mai.

Ngế pro xiâm hnê ngăn tơnêi têa séa ngăn, hnê tối mơjiâng pro 3 toăng  hngêi pơkeăng kân tung kong pơlê  Hà Nam

Mâu tíu khăm pơlât mê châ Khu xiâm ngăn pơkeăng pơlât kĭ a hơnăm 2014, pơxiâm mơjiâng pro a hơnăm 2015, tơngah pêi klei hơnăm 2017, la troh nôkố xuân hâi klêi. Ngế pro xiâm hnê ngăn tơnêi têa pơkâ thế Khu xiâm ngăn pơkeăng pơlât ƀă mâu khu xiâm, kơvâ cheăng tối nhên mâu tơdroăng tơvâ tơvân, malối cho ki xôi tung tơdroăng mơjiâng pro tơdroăng tơkêa bro, hnê tối vế hdró, mơnhên ngăn, kĭ tơhrâ mơjiâng pro, hlối pêi pro krâ pơklêp..., malối ‘nâi nhên xiâm gá ƀă hnoăng ki mơjiâng mâu tơdroăng ối pá tơvâ tơvân mê.

Tiô Ngế pro xiâm hnê ngăn tối tơdroăng ‘no liăn mơjiâng mâu hngêi pơkeăng hiăng hrá hên hơnăm, tơ’nôm liăn pro. Ki xiâm dêi tơdroăng mê cho ing mâu tơdroăng ki ối pá, ai xôi sap ing mơjiâng tơdroăng tơkêa bro, hnê tối mơnhên ngăn tơdroăng tơkêa bro, pơkâ ‘no liăn cheăng, rah khu ki mơjiâng pro, kĭ tơhrâ pêi, tơbleăng yă tơ’noăng pro, pơkâ ‘no liăn mơjiâng pro.

Pôa Phạm Minh Chính pơkâ thế mơjiâng tôh pêi cheăng xua Ngế xiâm ngăn pơkeăng pơlât pro ngế ki pơkuâ tôh, ƀă hlối veăng dêi mâu kăn mâu khu xiâm  pơkâ ƀă ‘no liăn cheăng, mơjiâng, liăn ngân, Luât pơkâ ƀă Vi ƀan kong pơlê Hà Nam pro tơdrêng tơdroăng séa ngăn, tối nếo tâi tâng mâu tơdroăng pêi tiô tơdroăng tơkêa pro; séa ngăn hlá mơ-eá mơjiâng pro tro tiô luât, tâi tâng kơxô̆ liăn ‘no mơjiâng pro, hâi khế pêi pro ƀă mâu tơdroăng xơpá tơvâ tơvân.

Gương tơplôu ƀă tơbleăng