VOV4.Xơ Đăng - Kơxê lơ 11/10, pôa Phạm Minh Chính, Ngế pro xiâm hnê ngăn tơnêi têa hiăng tơdah pôa Juan Ignacio Rubiolo, kăn phŏ hnê ngăn Grup pơkuâ on tơhrik  AES, kong têa Mih. AES cho grup pơkuâ têa châu têa kơxăng ối tung inâi 500 to kŏng ti kân má môi Mih xua hlá tơbeăng Fortune rah xo ƀă cho môi tung mâu kŏng ti xiâm lâp plâi tơnêi ‘na kơvâ têa châu têa kơxăng. AES ai hên tơdroăng ki rơkê tung mơjiâng bro, tê on tơhrik, mơjiâng bro hngêi trăng, troăng klông tung kơvâ cheăng ƀă kơmăi kơmok hâng pơklêp tung lâp plâi tơnêi.

A rôh tơdah, pôa Phạm Minh Chính mơnhên tối tơdroăng cheăng ki ‘no liăn tê mơdró, xuân môi tiah mâu tơdroăng tơrŭm, tŏng kum, hnê mơhnhôk troăng hơlâ mơjiâng dêi Grup pơkuâ AES a Việt Nam tung pơla hdrối nah; malối cho tung mâu kơvâ on tơhrik krúa vâ veăng kum ăm tơdroăng ki hơ’lêh on tơhrik, tơmiât troh tơdroăng pơkâ bro tơdâng carbon a hơnăm 2050.

Chin phuh Việt Nam kô rơtế ƀă tŏng kum, tŏng kum mâu tơdroăng ki pơkâ mơ’no mâu tơdroăng tơkêa ‘no liăn cheăng dêi Grup pkuâ AES rak tơniăn, tơƀrê ƀă ƀlêi chiâng, tơrŭm ‘no liăn cheăng krá tơniăn.

VOV Tây Nguyên/Tơplôu: Katarina Nga