Kơxê hâi lơ 31/10, pôa Phạm Minh Chính, Ngế pro xiâm hnê ngăn tơnêi têa tơdah pôa Kasper Rorsted, Kăn xiâm pơkuâ Grup Adidas dế ối pôu pêi cheăng a Việt Nam. Ngế pro xiâm hnê ngăn tơnêi têa phiu ro Adidas pơtối rah xo Việt Nam cho tơnêi têa ki vâ pêi cheăng tung la ngiâ ƀă ki kal xiâm tung tơdroăng tê, bro dêi Grup. Chin phuh Việt Nam kô pơtối hơ’lêh tơdroăng ki ‘no liăn cheăng, tê mơdró, hơ’lêh chêh bro hlá mơ-éa, đi đo tơmâng ngăn, pro tơ’lêi hlâu vâ mâu khu ki ‘no liăn cheăng tối tơdjuôm ƀă Adidas tối krê rak vế, po rơdâ ƀă mơnhông a Việt Nam.

Pôa Phạm Minh Chính, Ngế pro xiâm hnê ngăn tơnêi têa tơdah kăn xiâm pơkuâ Grup Adidas

Ngế pro xiâm hnê ngăn tơnêi têa pơkâ thế Adidas pơtối po rơdâ mơjiâng bro tê mơdró a Việt Nam môi tíu ki kal, ton xŏn, krá ton tiô tơdroăng cheăng tung la ngiâ dêi Grup, tơdrêng amê hlối tŏng kum, pro tơ’lêi hlâu ăm rế hía rế hên khu mơdró kâ Việt Nam châ veăng tung mâu hneăng ki pro pơxúa ‘na ki kơnâ tung tơdroăng tê tung lâp plâi tơnêi dêi Adidas. Pôa Kasper Rorsted tơbleăng mâu tơdroăng ki tê mơdró kơhnâ khât a Việt Nam, ăm ‘nâi Adidas kô pơtối mơdêk kơxô̆ kế tơmeăm ki vâ bro a Việt Nam xuân môi tiah mơdêk tâ nếo tung tâi tâng kế mâu yep, chêng khŏng ki dâi lĕm tung lâp plâi tơnêi dêi Grup.