Kơxê lơ 17/5, pôa Phạm Minh Chính, Ngế pro xiâm hnê ngăn tơnêi têa tơdah pôa François Michel, Kăn pơkuâ Grup John Cockerill, kong têa Ƀih ƀă Kăn teăng mâ kong têa Ƀih a Việt Nam, pôa Karl Van Den Bossche. A roh tơdah, pôa Phạm Minh Chính, Ngế pro xiâm tơnêi têa tối ăm ‘nâi Việt Nam krá tơniăn troăng tơpui kâ ƀă kong têa ê tơniăn krê, pơkuâ xêh, hơniâp lĕm, tơrŭm ƀă mơnhông mơdêk, hên troăng; mơjiâng tơdroăng cheăng kâ tơniăn krê, pơkuâ xêh ƀă hbrâ xêh, thăm mot tơrŭm lâp plâi tơnêi trâu hơngế, păng ‘nâng, châ tơƀrê.

Pôa Karl Van Den Bossche, Kăn teăng mâ kong têa Ƀih a Việt Nam mơnhên kong têa Ƀih pói vâ thăm tơrŭm ƀă Việt Nam tung mâu kơvâ, ki má lối tung pơla péa tơnêi têa dế leh tơbâ 50 hơnăm mơjiâng tơrŭm tơpui kâ, kheăn kơdeăn tơdroăng Chin phuh Việt Nam hiăng tơbleăng pơkâ pêi ‘na on tơhrik VIII, kố cho tơdroăng ki kal vâ mâu khu tê mơdró tơkŭm pêi pro mâu tơdroăng tơkêa bro ‘na on tơhrik.

Ngế pro xiâm hnê ngăn tơnêi têa pói vâ pôa Karl Van Den Bossche pơtối thăm pêi pro rơdêi, krếo thế mâu khu tê mơdró dêi kong têa Ƀih mơ’no liăn cheăng a Việt Nam, ki má lối cho tung mâu kơvâ nếo ki ô eăng môi tiah pơhlêh pêi cheăng xúa kŏng ngê̆, pơhlêh nếo troăng tơmiât, pơhlêh pêi cheăng krúa lĕm kong prâi.