Kơxê lơ 24/5, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh tơdah pôa Karan Adani, Kăn pơkuâ Kŏng ti kơno tuk ƀă kơpong cheăng kâ, ối tung Grup pơkuâ Adani – môi tung mâu grup pơkuâ cheăng kâ kân má môi Ấn Độ, dế hriăn plĕng, séa ngăn, tí tăng mâu roh tơ’lêi mơ’no liăn cheăng a Việt Nam.

A roh tơdah, pôa Phạm Minh Chính, Ngế pro xiâm hnê ngăn Chin phuh phiu ro pôa Karan Adani lăm pôu pêi cheăng a Việt Nam; mơnhên Việt Nam đi đo nhuô̆m tơrŭm cheăng nhŏng o tiô khôi vâi krâ nah ƀă tơrŭm ƀă Ấn Độ; phiu ro tơrŭm cheăng ton xŏn pơla péa tơnêi têa dế mơnhông mơdêk tơƀrê tung mâu kơvâ cheăng. Ngế pro xiâm hnê ngăn tơnêi têa tối nhên, pơhlêh xúa kŏng ngê̆ tung pêi cheăng, mơjiâng cheăng kâ xúa kơmăi kơmok, pơlê pơla xúa kŏng ngê̆ cho troăng prôk dêi lâp plâi tơnêi, Việt Nam ôh tá ối pá kong troăng prôk mê ƀă pói vâ Adani po rơdâ mơ’no liăn ó rơdêi tung kơvâ kố.

Ngế pro xiâm hnê ngăn Chin phuh Việt Nam hbrâ rơnáu pro tơ’lêi hlâu vâ Grup pơkuâ Adani pơtối hriăn plĕng mâu tơdroăng tơkêa bro mơ’no liăn cheăng ki ê a Việt Nam, tơdrêng amê, djâ troăng ahdrối tung tơdroăng mơhnhôk tơ’nôm mâu khu mơ’no liăn cheăng Ấn Độ troh Việt Nam.