Kơxo lơ 20/10, klêi kơ’nâi pôa Vương Đình Huệ, Kăn xiâm hnê ngăn Kuô̆k hô̆I tơbleăng pơxiâm po hneăng hôp má 4, Kuô̆k hô̆i hneăng má XV, pôa Phạm Minh Chính, Ngế pro xiâm hnê ngăn Chin phuh hiăng tơbleăng mâu tơdroăng châ tơƀrê pêi pro pơkâ mơnhông mơdêk cheăng kâ – rêh ối pơlê pơla hơnăm 2022; tiô tối hdrối pơkâ pêi mơnhông mơdêk cheăng kâ – rêh ối pơlê pơla hơnăm 2023.

‘Na hnoăng cheăng, troăng pêi ki xiâm mâu khế mơ’nui hơnăm 2022 Ngế pro xiâm hnê ngăn tơnêi têa pơlâ mâu khu râ, mâu kơvâ cheăng, mâu kong pơlê pơtối pêi pro tơdâng tơ’mô, châ tơƀrê mâu hnoăng cheăng, túa cheăng pơkâ tung mâu kơvâ cheăng.

Tơtrŏng hbrâ mơdât pơreăng COVID-19, ôh tá ăm pơreăng xông tâ tú; thâ tah lôi tơdroăng ki ôh tá bê pơkeăng, kơmăi kơmok, tơmeăm khăm pơlât. ‘Na pơkâ pêi mơnhông mơdêk cheăng kâ – rêh ối pơlê pơla hơnăm 2023 Ngế pro xiâm hnê ngăn tơnêi têa tối rơdêi tơdroăng pơtối kơjo rak krá tơniăn tơdroăng cheăng kâ kân, mơdât tơdroăng liăn chu rơpâ yă, thăm mơnhông mơdêk cheăng kâ, tơniăn tơdâng kân dêi tơdroăng cheăng kâ. Mơdât châ tơƀrê mâu pơreăng. Thăm vêh pơ’lêh, mơdêk ivá pêi cheăng, tơdroăng ki mơ-eăm xêh, pơkuâ xêh, ai ivá kâi trâng ƀă tơdroăng cheăng kâ; thăm pêi pro tơniăn, mơnhông mơdêk mâu tơdroăng tơtêk nếo.

VOV