Hơnăm 2022, kơvâ pơkuâ kăn ƀô̆ hiăng châ tơƀrê kal khât, ki rơhêng vâ tối tung hnê mơhno, pơkuâ dêi Kơvâ pơkuâ kăn ƀô̆ pơtối châ pơ’lêh nếo, tơniăn pêi kêi ôh tá ai kreăng tíu ki lâi, môi tuăn, châ tơƀrê. Pêi pro lĕm tung hnoăng cheăng kơ koan hnê mơhno má má môi tơdroăng pơ’lêh troăng hơlâ dêi Chin phuh, kum djâ châ tơƀrê hên, hiăng tơkŭm po 09 roh hôp tơdroăng mơjiâng luât, tơpui tối, tơbleăng ăm pêi pro 39 tơdroăng pơkâ, tơdroăng tơkêa bro luât; tơkŭm mơjiâng tơdroăng tơkêa bro xing xoăng tơniăn tíu cheăng pơkuâ tơnêi têa râ tơring, râ cheăm hneăng hơnăm 2022 – 2025, mơnhên troăng prôk troh hơnăm 2030. Tơdroăng pêi cheăng tơpui kâ ƀă kong têa ê châ tơtrŏng ƀă châ tơƀrê hên. Tơkŭm po châ tơƀrê Hneăng hôp mâu ngế ối a ko pơkuâ tơdroăng tơnêi têa ASEAN ƀă ASEAN+3.

Xông tơpui hnê mơhno hneăng hôp, Ngế pro xiâm hnê ngăn tơnêi têa pơkâ, tung la ngiâ tơkŭm thăm pêi pro rĕng, mơdêk tơdroăng ki châ tơƀrê mơjiâng ƀă kêi đeăng troăng pơkâ pêi, troăng hơlâ tung kơvâ pơkuâ kăn ƀô̆; pơ’lêh nếo bă kêi đeăng troăng pơkuâ kăn ƀô̆, kŏng chưk, viên chưk tiô hnê mơhno tơdâng tơ’mô, môi tuăn, rơtế a mê Ngế pro xiâm hnê ngăn tơnêi têa pơkâ, pơtối kêi đeăng khu râ kăn pơkuâ tơnêi têa tơniăn tro, pêi cheăng châ tơƀrê; pêi pro châ tơƀrê Tơdroăng tâi tâng pơ’lêh tung pơkuâ tơnêi têa troh hơnăm 2030.