Pơtối tơdroăng pêi cheăng dêi Hneăng hôp Khu râ kăn xiâm ASEAN 42, kơxo lơ 11/5, pôa Phạm Minh Chính, Ngế pro xiâm hnê ngăn tơnêi têa hiăng rơtế khu râ kăn pơkuâ mâu kong têa veăng hôp kŭn tơpui tơno ‘na mâu tơdroăng lâp plâi tơnêi ƀă kơpong. Vêh mơnhên troăng tơmiât pêi dêi ASEAN ‘na mâu tơdroăng kơpong, lâp plâi tơnêi rơtế tơmâng, Ngế pro xiâm hnê ngăn tơnêi têa tối rơdêi gâk kring hơniâp lĕm, tơniăn, gâk kring, tơniăn tơ’lêi trâu troăng têa kơxĭ ƀă troăng tơƀai a têa kơxĭ Biển Đông rế cho pơxúa, rế cho hnoăng dêi tâi tâng mâu kong têa.

Ngế pro xiâm hnê ngăn tơnêi têa pơkâ thế ASEAN, mơhé pá puât, kal krá ƀă pơkâ tŏng kum Myanmar pêi pro tŭm ‘’Môi tuăn 5 tơdroăng’’ xua kuăn pơlê Myanmar, xua rŭm môi tuăn, loi tơngah ƀă um méa dêi ASEAN, ƀă xua tơdroăng pói tơngah dêi mâu kong têa lâp plâi tơnêi; tŏng kum Kăn xiâm hnê ngăn kong têa Indonesia ƀă Khu râ kăn teăng mâ mơnhông mơdêk hnoăng djâ troăng ahdrối, djâ ASEAN pêi pro pơkâ kơpêng.

ASEAN kal rak châ chê ôh tá tơdjâk pakong, tơdâng, pôu râng hnoăng cheăng tung tơdroăng Rusi – Ukraina, tơrŭm ƀă mâu khu tơrŭm, kơdroh tơdjâk dêi tơplâ tơplong ƀă kơpong, rơtế veăng tŏng kum ăm hơniâp lĕm, rak tơniăn, tơrŭm cheăng ƀă mơnhông mơdêk.