VOV4.Xơ Đăng - Kơxo lơ 22/8, a Hà Nội, pôa Phạm Minh Chính, Ngế pro xiâm hnê ngăn tơnêi têa veăng Hneăng hôp hlê plĕng tŭm ƀă po rơdâ pêi pro Pơkâ kơxô̆ 08 dêi Khu xiâm kal kí ‘na thăm mơnhông mơdêk kơmăi kơmok cheăng lêng troh hơnăm 2030 ƀă mâu hơnăm pơtối mê xua Khu pơkuâ Đảng kơvâ lêng Tơnêi têa – Khu xiâm pơkuâ lêng tơkŭm po.

Ngế pro xiâm hnê ngăn veăng hneăng hôp tơbleăng hlê plĕng tŭm ƀă po rơdâ pêi tiô Pơkâ kơxô̆ 8 dêi Khu xiâm kal kí

Xông tơpui hnê mơhno hneăng hôp, pôa Phạm Minh Chính, Ngế pro xiâm hnê ngăn tơnêi têa tối nhên, Pơkâ kơxô̆ 08 mơhno tơdroăng ki tơmâng trâu hơngế, tơdroăng pói tơngah ƀă loi tơngah dêi Đảng, Tơnêi têa ƀă kuăn pơlê ƀă kơvâ Kơmăi kơmok cheăng lêng, pêi pro pơkâ mơjiâng Khu lêng troh hơnăm 2025 rah tơtro mơngế, tŭm, pro ki xiâm vâ krá tơniăn, mơ-eăm troh hơnăm 2030 mơjiâng khu lêng kuăn pơlê kăch măng, ki rơkê păng ‘nâng, ƀeăn ƀĕng rơkê, tiô chal nếo.

Tơdrêng amê, pêi pro Pơkâ kơxô̆ 08 xuân kum thăm mơnhông xúa kơmăi kơmok tiô chal nếo, tơnêi têa pêi cheăng tiô rơxông nếo, mơjiâng tơdroăng cheăng kâ tơniăn krê, pơkuâ krê xêh; hbrâ pêi xêh, thăm mot tơrŭm lâp plâi tơnêi trâu hơngế, păng ‘nâng ƀă châ tơƀrê.

A Sa Ly tơplôu ƀă tơbleăng