VOV4.Xơ Đăng - Peăng xêi hâi lơ 14/10, a Hngêi Kuô̆k hô̆i hiăng po Hneăng hôp Đảng đoân Kuô̆k hô̆i ƀă Khu hnê mơhno cheăng Đảng dêi Chin phuh ‘na hnoăng cheăng hbrâ ăm Hneăng hôp má 4, Kuô̆k hô̆i hneăng 15. Pôa Phạm Minh Chính, Ngế pro xiâm hnê ngăn, pôa Vương Đình Huệ, Kăn xiâm hnê ngăn Kuô̆k hôi veăng ai mâ ƀă pơkuâ ngăn hneăng hôp. Tiô pôa Bùi Văn Cường, Kăn xiâm chêh tôm xo rơkong dêi Kuô̆k hô̆i, Ngế xiâm ngăn Ƀơrô Kuô̆k hô̆i tối, hneăng hôp roh kố, Kuô̆k hô̆i kô pêi cheăng tung plâ 21 hâi, pakĭng mâu tơdroăng tơkêa luât kô ăm mâu kăn veăng tơpui tối ƀă tơbleăng mâu tơdroăng ki u ối “tô” pro chiâng ai tơdroăng ki ôh tá hâi tơniăn tung pơlê pơla, ki châ kuăn pơlê rơhêng vâ châ ‘nâi plĕng, vâ tơleăng mơnhên, mê khu kăn Kuô̆k hô̆i kô pơkâ thế pêi pro nhên tung tơdroăng tơpui tơno, êng tiâ ‘na mâu tơdroăng tối tơbleăng ‘na cheăng kâ-rêh ối pơlê pơla, tơdroăng pêi lo, ‘no hrê liăn ngân dêi tơnêi têa lơ mâu roh ki êng mơnhên.

Kăn xiâm hnê ngăn Kuô̆k hô̆i hôp ƀă tâ tá hneăng hôp

Xông tơpui a roh hop mê, pôa Phạm Minh Chính hiăng séa mơnhên ‘ló khât hnoăng cheăng ki hbrâ ăm roh hôp má 4 dêi Kuô̆k hô̆i, tơdroăng tơrŭm cheăng ki hbrâ ăm roh hôp má 4 châ pêi pro kơtăng khât, tro tiô tơdroăng.

Ngế pro xiâm hnê ngăn Chin phuh hôp ƀă tâ tá hneăng hôp

Péa pâ hiăng tơrŭm cheăng krá khât, tơƀrê, mâu tơdroăng tơkêa bro luât hiăng ai mâu kăn tơpui tơno, êng tiâ mơnhên rơhí rơhó. Mâu Vi ƀan dêi Kuô̆k hô̆i ƀă Khu xiâm ngăn ‘na mâu tơdroăng cheăng hiăng tơrŭm, pêi kơhnâ khât tung mơjiâng, tơdroăng ki pơtroh mâu hlá mơ-éa rak vế, pêi pro tung hâi khế ki iâ, la dâi khât, tơƀrê păng ‘nâng.

VOV/Tơplôu: Nhat Lisa