Tiô rơkong krếo thế dêi pôa Nguyễn Xuân Phúc, Kăn xiâm hnê ngăn Tơnêi têa, Ngế xiâm chêh tôm xo rơkong Khu lâp kong têa cho pôa António Guterres hiăng lăm pôu păng ‘nâng a Việt Nam sap ing hâi lơ 21 – 22/10/2022. Kơxê lơ 21/10, leh tơdah hiăng châ tơkŭm po kân krip a Tíu pêi cheăng kăn xiâm hnê ngăn tơnêi têa. Klêi kơ’nâi leh tơdah, pôa Nguyễn Xuân Phúc hiăng tơpui tơno ƀă Ngế xiâm chêh tôm xo rơkong Khu lâp kong têa.

Ngế xiâm chêh tôm xo rơkong Khu lâp kong têa prế pôa Nguyễn Xuân Phúc, kăn xiâm hnê ngăn tơnêi têa

A rôh tơpui tơno, pôa Nguyễn Xuân Phúc tối nhên mâu tơdroăng ki hiăng pêi pro ƀlêi chiâng, ai pơxúa dêi Việt Nam tung mơnhông mơdêk tơnêi têa; tối nhên troăng hơlâ tơpui kâ tơniăn krê, hên kơvâ cheăng hơ’lêh, hbrâ rơnáu xêh ƀă kơhnâ mot tơrŭm cheăng ƀă kong têa ê dêi Việt Nam. Ngế xiâm chêh tôm xo rơkong Khu lâp kong têa tối mơnê, hâk mơnâ kơ Pôa Hồ Chí Minh ƀă Việt Nam tung rôh tơplâ tơleăng lĕm hdroâng mơngế ƀă vêh ‘mâi mơnhông tơnêi têa, rơkâu mâu tơdroăng ki kân kĭn dêi Việt Nam tung hbrâ mơdât pơreăng COVID-19, ‘mâi mơnhông ƀă mơndêk cheăng kâ rêh ối pơlê pơla; loi tơngah Việt Nam kô pơtối tơbleăng tơƀrê mâu troăng hơlâ tơniăn kân rơdêi, xo kuăn pơlê pro tơdroăng ki xiâm, rak vế kong prâi tơnêi tíu, hbrâ ví ƀă kong prâi pro hơ’lêh, chiâng túa pơkâ tơƀrê vâ mâu kong têa ki ê hriâm tâp.