A pơlê kong kơdrâm Kon Tum, Khu kăn ki pêi hnoăng cheăng dêi Khu xiâm ngăn Khoa hok ƀă Kong ngê̆ xua pôa Huỳnh Thành Đạt, ngế cheăng tung tíu xiâm Đảng, ngế xiâm ngăn khoa hok pro kăn pơkuâ khu kăn kố hiăng ai rôh pêi cheăng ƀă kong pơlê Kon Tum ƀă mâu khu râ kơvâ cheăng ki ai tơdjâk dêi kong pơlê ‘na tơdroăng ki pêt sâm Ngọc Linh ƀă kế tơmeăm dêi tơnêi têa sâm Việt Nam ki kal cho sâm Ngọc Linh.

Klêi kơ’nâi hên hơnăm rak vế hdrê, troh nôkố, kong pơlê Kon Tum ai tâi tâng ƀăng tơnêi lối 1.260 ha sâm Ngọc Linh ƀă tâi tâng châ xo tiô riân ai 213 tâ̆n, ki xiâm troh hơnăm 2025 tâi tâng ƀăng tơnêi pêt sâm Ngọc Linh dêi kong pơlê châ 4.500 ha. Tơpui a rôh pêi cheăng, pôa Huỳnh Thành Đạt pơcháu hnoăng ki mơnhên ăm rêm tíu pêi cheăng ki ai tơdjâk dêi Khu xiâm ƀă pơkâ thế mâu tíu pêi cheăng rĕng hriăn ngăn tơbleăng pêi pro. Pôa Huỳnh Thành Đạt tối nhên kố xuân cho mâu troăng hơlâ ki kal ƀă ki xiâm vâ mơnhông krá tơniăn pêt sâm Ngọc Linh.