VOV4.Xơ Đăng - Kơxê lơ 15/9, Khu râ kăn pêi cheăng dêi Khu xiâm pơkuâ tơdroăng kal tiô troăng um tơvi, rơ’jíu ƀă Internet xua pôa Nguyễn Mạnh Hùng, Ngế xiâm pơkuâ djâ hiăng troh lăm pôu ƀă pêi cheăng a kong pơlê Bạc Liêu ‘na tơdroăng pơ’lêh xúa kơmăi kơmok ƀă tơdroăng pêi pro Tơdroăng tơkêa bro mơnhông mơdêk tíu kơdrâm kuăn pơlê rêh ối rơkê. Xông tơpui a roh pêi cheăng, pôa Nguyễn Mạnh Hùng tối ăm ‘nâi, ing riân dêi kong pơlê Bạc Liêu ai dâng 30 rơpâu rơpŏng kơtiê, vâ chê kơtiê ôh tá ai phôn râng kŏng ki chiâng po hyôh măng, Khu xiâm kô tŏng kum 15 rơpâu to ăm kong pơlê ing tơdroăng ‘’Hyôh kơmăi tĭnh ăm o’’.

Ngế xiâm pơkuâ tơdroăng tối tơbleăng nếo pêi cheăng a kong pơlê Bạc Liêu

Ƀă 15 rơpâu to kơmăi ki nếo, Ngế xiâm pơcháu ăm 3 tíu cheăng pơkuâ troăng hyôh măng kân má môi (VinaPhone, MobiFone, Viettel) tŏng kum ăm kong pơlê. Ƀă mâu tơdroăng pâ thế ki ê dêi kong pơlê Bạc Liêu, pôa Nguyễn Mạnh Hùng pơcháu ăm mâu tíu cheăng dêi Khu xiâm tŏng kum tah lôi mâu tơdroăng pá puât.

Pôa Nguyễn Mạnh Hùng xuân pơkâ thế kong pơlê Bạc Liêu séa ngăn klâ Khu pơkuâ ‘na mơhno túa lĕm tro, Tơdroăng kal, Tơ’noăng ivá ƀă Ôm hyô, lo tơ’nôm môi Khu pơkuâ cheăng cho Khu pơkuâ tơdroăng kal tiô troăng hyôh măng Internet.

A Sa Ly tơplôu ƀă tơbleăng