Tung pơla Việt Nam tơmiât troh pơkâ mơ'no trếo 'mêi ƀă kơlo 0 a hơnăm 2050, on tơhrik kơtâu ƀă khía châ mâu kăn tối môi tiah môi tơdroăng on tơhrik ki kân, pêi cheăng tơniăn ƀă ai kơlo mơ'no trếo 'mêi iâ. On tơhrik kố kô kum rak tơniăn ivá ăm on tơhrik, tơdrêng amê kum mâu on tơhrik ki vêh pro môi tiah on tơhrik kơtâu ƀă khía ƀă on tơhrik kơtâu ƀă hyôh tôu mâ hâi.

Môi tung mâu tơdroăng ki châ tơmâng a hneăng hôp tơpui tơno cho rah xo kŏng ngê̆ ƀă rak tơniăn. Mâu ngế rơkê tơpui tơno 'na mâu rơxông kơmăi kơmok ki nếo, kơmăi kơmok modul kŭn ƀă tơdroăng ki rơkê plĕng lâp plâi tơnêi, ing mê pơtroh tơ'nôm tơdroăng ki rơkê plĕng khoa hok ăm tơdroăng rah xo kŏng ngê̆ tơtro ƀă tơdroăng ki ai khât Việt Nam. Tiê̆n sih Trần Chí Thành, Kăn pơkuâ Tíu xiâm ngăn 'na on tơhrik ki pro ƀă trếo tik nik Việt Nam, tối ăm 'nâi:

‘’Tiô troăng tơmiât á ƀă mâu ngế ki hriăn plĕng tung kơvâ hriăn plĕng tơniăn, á hlo mơjiâng pro dêi Rusi, ki rơhêng vâ tối Rosatom, hiăng châ tơnêi têa pin rah xo cho lĕm 'nâng, hiăng tơbleăng a hên kong têa. Ai hên hĕng tơdroăng ki rak tơniăn, ngin athế hriăn plĕng nhên, krá khât, lĕm 'nâng. Kố cho tơdroăng ki mơjiâng pro lĕm 'nâng, hlối ai tơniăn krê, hlối tơniăn tơdjuôm, rak tơniăn châ hrĭng hơnăm pêi cheăng’’.

Ôh tá xê to tơdroăng tơpui 'na môi on tơhrik nếo, mơjiâng on tơhrik kơtâu ƀă trếo tik nik ối pơkâ thế mơjiâng ivá cheăng tơnêi têa. Mê cho hnê mơjiâng khu ki rơkê, kih sư ƀă mơngế pêi cheăng rơkê; mơdêk ivá hriăn plĕng, pơkuâ, mơjiâng, mơjiâng pro, pêi cheăng ƀă rak ngăn; tơdrêng amê mơdêk pơhlêh hlê plĕng, chôa 'lâng mơjiâng ƀă mơnhông kơmăi kơmok tŏng kum tung tơnêi têa.

Ƀă Khánh Hòa, tíu pêi pro mâu tơdroăng tơkêa bro Hngêi kơmăi on tơhrik kơtâu ƀă trếo tik nik Ninh Thuận 1 ƀă Ninh Thuận 2, mâu tơdroăng pơkâ kố tơdjêp tơdrêng ƀă tơdroăng hbrâ dêi kong pơlê. Tơdrêng ƀă tơdroăng tăng tơnêi, tơ'nôm mơngế pêi cheăng ƀă hbrâ tơmeăm khoăng, môi tơdroăng châ tơmâng khât cho tơniăn hnoăng pơxúa ƀă tơdroăng rêh ối ton xŏn dêi kuăn pơlê tung kơpong tơdroăng tơkêa bro. Pôa Trịnh Minh Hoàng, Kăn phŏ hnê ngăn Vi ƀan kong pơlê Khánh Hòa, tối nhên:

“Mâu tơmeăm khoăng kum ăm tơdroăng tơkêa bro thế châ hriăn plĕng tiô troăng hơlâ hên tơdroăng, rế rak tơniăn pơkâ dêi hngêi kơmăi rế mơjiâng ivá mơnhông ăm peăng Hdroh kong pơlê ƀă kum ton xŏn ăm kuăn pơlê. Tơdroăng vêh pro pơlê nếo thế rơtế ƀă mơjiâng tơdroăng cheăng kâ, cheăng pêi, hnê hriâm, hnê cheăng pêi, khăm pơlât pơlê pơla tơdâng tơ'mô. Ki ƀlêi chiâng dêi vêh pro pơlê nếo ôh tá xê to châ pơkâ ƀă tơdroăng pơcháu tơnêi mê ối ƀă ki dâi lĕm tơdroăng rêh ối ƀă rôh tơ'lêi mơnhông dêi kuăn pơlê klêi kơ'nâi troh tíu ối nếo’’.

Ing tơdroăng tơpui 'na on tơhrik kơtâu ƀă trếo tik nik kô hlo, tơdroăng pơkâ mơnhông tung hneăng nếo ôh tá xê to pơtê a tơdroăng ai tơ'nôm on tơhrik. Mê ối cho ƀai toăn pro pơkuâ khoa hok kŏng ngê̆, mơjiâng mơngế pêi cheăng, mơnhông kơmăi kơmok tung tơnêi têa, 'mâi mơnhông hngêi trăng troăng klông ƀă pro chiâng mâu ivá mơnhông nếo ăm mâu kong pơlê.

Mơgêi hneăng hôp, pôa Ngô Đông Hải, Kăn phŏ pơtâng tối tơdroăng kal Tơnêi têa, mơnhên ing 19 tơdroăng veăng hnê tối ƀă mâu rơkong tơpui tối, mâu kăn hiăng tơkŭm pêi pro nhên hnoăng cheăng dêi on tơhrik kơtâu ƀă trếo tik nik, pơkâ thế 'na kŏng ngê̆, mơngế pêi cheăng, hngêi trăng troăng klông ƀă tơdroăng pơtâng tối, mơhnhôk. Mơnhông on tơhrik kơtâu ƀă trếo tik nik xua mê châ pơkâ tung môi ƀai toăn tâi tâng, ing rak tơniăn on tơhrik, tơniăn kơmăi kơmok troh mơjiâng ivá tơnêi têa, mơnhông kong pơlê ƀă pro tơdroăng môi tuăn pơlê pơla. Pôa Ngô Đông Hải mơnhên tối:

“Mâu khu mơdró kâ thế pơtối tơrŭm krá tơniăn, veăng pê klêi tơdroăng cheăng khoa hok, tơdroăng cheăng luât, hbrâ mơngế pêi cheăng ki rơkê, hngêi trăng troăng klông vâ hbrâ rơnáu veăng tung tơdroăng tơkêa bro tro tiô pơkâ, tơniăn khât. Malối, veăng pêi kơhnâ khât tung tơdroăng tối tơbleăng, mâu tơdroăng cheăng khoa hok kơmăi kơmok thế tơ'lêi hlê plĕng ăm kuăn pơlê.’’

On tơhrik kơtâu ƀă trếo tik nik, tung troăng tơmiât kố, ôh tá xê to tơdroăng dêi kơvâ on tơhrik. Cho môi tơdroăng tung pơla Việt Nam hbrâ mơjiâng xiâm kối ăm môi hneăng mơnhông nếo - tíu khoa hok kŏng ngê̆, mơngế pêi cheăng rơkê ƀă ivá pơkuâ mâu kŏng ngê̆ kân chiâng ivá ki kal vâ tơnêi têa mơnhông tơƀrê, rak tơniăn on tơhrik ƀă mơnhông rơdêi tung chal nếo.