Sap apoăng hơnăm ta troh nôkố, Khu ngăn on tơhrik Dak Lak hiăng tơkŭm po chât hâi hnê tối rak tơniăn troăng prôk, tơniăn ăm mơngế pêi cheăng. A mâu rôh hnê tối, mâu kăn ƀô̆ kŏng nhân ki pêi cheăng hiăng châ tối nhên ‘na tơdroăng thế pro tơniăn troăng prôk, tơniăn ăm mơngế pêi cheăng tung kơvâ ngăn ‘na on tơhrik tung kong pơlê Dak Lak; mâu pơkâ dêi luât ‘na rak tơniăn troăng prôk, túa lĕm tro, ‘na luât pêi cheăng.

Malối, ing tơdroăng tối nhên mâu tơdroăng ki pro xôi, mâu rôh ai tơdroăng xía vâ tơklâm rơxế a troăng prôk, mâu kăn ƀô̆ kăn sát gak troăng prôk hiăng kum mâu kăn ƀô̆ kŏng nhân kơvâ cheăng ‘na on tơhrik hnê ‘na tơdroăng prôk drô troăng vâ ví mâu tơdroăng xía vâ tâng lơ trâm. Tiô ăm ‘nâi, tơdroăng hnê tối ‘na luât ‘na rak tơniăn troăng prôk, tơniăn ăm mơngế pêi cheăng rêm hâi, đi đo dêi kơvâ ngăn on tơhrik Dak Lak, veăng ‘no hnoăng mơdêk hlê plĕng, ai hnoăng  cheăng dêi kăn ƀô̆ kŏng nhân tung pơla prôk drô troăng, pêi cheăng, pêi tro tơdroăng xúa on tơhrik tơniăn.