VOV4.Xơ Đăng - Pêi pro Hâi Lâp plâi tơnêi kơdroh iâ tơdroăng ki ôh tá mơhúa xua kong mê khía mơhot kân têa kân lân lu ƀă Hâi ASEAN ‘na rak ngăn kong mê khía mơhot kân, sap ing hâi lơ 13 troh 19/10/2022, PC Dak Lak hiăng tơkŭm po hên tơdroăng hnê tối, veăng kum mơdêk hlê plĕng, pôu râng hnoăng cheăng dêi rêm râ khu pú hên ƀă mâu ngế krê tung hnoăng cheăng hbrâ ví khía mơhot têa kân lân lu.

PC Dak Lak tơbâ hâi Lâp plâi tơnêi kơdroh xía vâ xua kong mê khía mơhot têa kân lân lu

Ƀă inâi “Rĕng tối tơbleăng ƀă rĕng tŏng kum”, mâu tíu pêi cheăng on tơhrik pơtối tơbleăng tơdroăng kal, um ‘na hnoăng cheăng hbrâ ví khía mơhot têa kân lân lu a mâu ƀâng tơbleăng hnê tối, tơdroăng tơniăn pêi cheăng dêi tíu pêi cheăng, a trang web; kơtúa ƀăng-rôl a mâu tíu pêi cheăng ƀă mâu kơpong ki ai hên kuăn pơlê rêh ối ƀă hên ki ê.

Kŏng ti xuân đi đo hbrâ rơnáu mâu khu ki tŏng, mâu rơxế, kế tơmeăm, hbrâ rơnáu tơbleăng mâu túa pơkâ hbrâ ví drêng ai kong mê khía mơhot têa kân lân lu, ai tơdroăng ki ôh tá tơniăn. Hâi Lâp plâi tơnêi kơdroh iâ tơdroăng ki ôh tá mơhúa ‘na kong mêi khía mơhot têa kân lân lu lơ 13/10 châ pơxiâm a hơnăm 1989,  xua Khu lâp kong têa pơkâ vâ mơdêk ki hlê plĕng ‘na mơhno túa lĕm tro tung lâp plâi tơnêi ‘na kơdroh ki ôh tá mơhúa drêng kong mê khía mơhot kân. Khu tơrŭm mâu kong têa tung Đông Nam Á xuân xo hâi kố vâ pro Hâi ASEAN ‘na rak ngăn kong mê khía mơhot têa kân lân lu rêm hơnăm.

VOV Tây Nguyên/Tơplôu: Katarina Nga