VOV4.Xơ Đăng - Tơdjêp mơngế pêi cheăng ƀă xúa kơmăi kơmok kŏng ngê̆, mơ-eăm ai tŭm teăm tơdrêng tơdroăng kal vâ ‘na on tơhrik ƀă mâu tơmeăm ki vâ xúa tung rơpŏng, Kŏng ti on tơhrik Dak Nông hiăng mơjiâng tơdroăng ki loi tơngah, ki lĕm ƀă kuăn pơlê. Pêi pro tiô khôi túa lĕm tro dêi khu tê mơdró, kăn ƀô̆ kŏng nhân kơvâ on tơhrik Dak Nông đi đo tá hiâm mơno ƀă tơdroăng cheăng, xo kuăn pơlê pro tíu xiâm tung rêm tơdroăng cheăng, mơjiâng um méa mơngế  pêi cheăng ngăn ‘na on tơhrik tá hiâm mơno, lĕm tơ’lêi achê ƀă pơlê pơla.

PC Dak Nông pro hngêi tuăn pâ ăm jâ Đặng Muì Quyền, cheăm Dak Wil, tơring Cư Jút

Pakĭng mê, tơdroăng mơ’no liăn hrĭng rơtal liăn vâ pêi pro mâu tơdroăng tơkêa bro djâ on tơhrik vêh a kơpong hơngế hơngo, PC Dak Nông ối pêi pro hên tơdroăng rêh ối pơlê pơla, veăng kum mơdêk tơdroăng rêh ối kuăn pơlê. Rêm hơnăm, kŏng ti pêi pro mâu tơdroăng mơjiâng hngêi tuăn pâ; kơxuô tơmeăm ăm mâu rơpŏng ai hnoăng tơnêi têa, mơngế kơtiê rêm roh leh, têt; diâp hnoăng liăn hriâm rơkê ăm hok tro kơtiê; tŏng kum kơxô̆ liăn ăm tíu pế pơchên kế kâ tuăn pâ a mâu hngêi pơkeăng tung kong pơlê Dak Nông ƀă hía hé, ƀă tâi tâng kơxô̆ liăn dâng 500 rơtuh liăn.

VOV Tây Nguyên/Tơplôu: A Sa Ly