VOV4.Xơ Đăng - Ƀă tơdroăng pơkâ mơdêk ki dâi rơkê, tung pơla hdrối nah, Kŏng ti On tơhrik Dak Nông hiăng hơ’lêh tơdroăng ki chêh pro hlá mơ-éa nâp liăn, mơdêk tơdroăng ki tơbleăng tơdrăng tung tơdroăng ki chêh pro pơkâ tơleăng ‘na mâu hlá mơéa ‘na on tơhrik. Tơdrêng amê hlối pêi pro hơ’lêh mâu tơdroăng ki tơdah xo tơdroăng pơkâ thế ‘na tơdroăng on tơhrik, môi tiah tơdah tơdrêng a mâu kơbong pêi cheăng, ing troăng hyôh Internet dêi Tổng đài tŏng kum kuăn pơlê kơxô̆ 19001909, ing website ƀă hên ki ê.

Ngế cheăng PC Dak Nông hnê tơdrêng ăm tơmối xúa mâu tơdroăng ‘na mơdrếo, nâp liăn on tơhrik

Drêng ai tơdroăng ki ối tô tuăn ‘na on tơhrik, kuăn pơlê bu kal krếo troh tổng đài mê hiăng châ pơkâ tơleăng rĕng, tơƀrê. Krê ing Cổng dịch vụ công tơnêi têa, sap ing apoăng hơnăm troh nôkố, PC Dak Nông hiăng tơleăng vâ chê 20 rơpâu phĭu tơdah ‘na on tơhrik ing măng Internet kâ̆p đô̆ 4. Tiah mê, tung pơla tơdah, tơleăng ‘no on tơhrik hiăng pro ‘nâng ‘nâi 2 hâi tâng pơchông ƀă pơkâ.

Nôkố Kŏng ti tơbleăng kum 12 tơdroăng ‘na on tơhrik teăng ăm hơ’lêh tơdroăng tơkêa roê tê on tơhrik. Tơmối bu kal po ngăn tung tíu www.dichvucong.gov.vn mê hiăng chiâng vâ xúa 12 tơdroăng ‘na on tơhrik tiô túa ki tơ’lêi ƀă  rĕng má môi.

Katarina Nga tơplôu ƀă tơbleăng