VOV4.Xơ Đăng - Hâi lơ 26/9, pôa Lê Minh Hoan, ngế xiâm pơkuâ ngăn chiâk deăng ƀă Mơnhông thôn pơlê, kăn phŏ pơkuâ Khu hnê mơhno cheăng Khu hnê mơhno cheăng Tơnêi têa ‘na hbrâ ví khía mơhot têa kân lân lu rơtế ƀă Khu kăn ki pêi dêi hnoăng cheăng hiăng lăm séa ngăn hnoăng cheăng hbrâ ví khía mơhot kân rôh má 4 a kong pơlê Quảng Ngãi ƀă séa ngăn tơniăn dêi long têa Phú Ninh, kong pơlê Quảng Nam.

Pôa Lê Minh Hoan hiăng séa ngăn ‘noăng ki hbrâ mơdât tơhnâp Cửa Đại, pơlê kong kơdrâm Hội An, kong pơlê Quảng Nam ƀă hmâng tối tơbleăng hnoăng cheăng hbrâ ví ƀă khía mơhot kân a kong pơlê Quảng Nam. Pôa Lê Minh Hoan mơnhên tối khât tơdroăng ki hbrâ ví dêi mâu kong pơlê Quảng Nam, Quảng Ngãi.

Pôa Lê Minh Hoan, ngế xiâm ngăn chiâk deăng ƀă Mơnhông thôn pơlê séa ngăn hbrâ ví khía mơhot kân rôh má 4 a Quảng Nam

Tiô ngế xiâm pơkuâ, mâu kong pơlê kố pơrá ai péa kơpong trâm ƀă khía mơhot kân, mê cho ‘na tơdroăng a têa athế riân ngăn mâu plong tuk, ‘mâi xĕn kuăn pơlê ki tơnăng ká xi xŏng; ƀă kơpong peăng kong ngo athế hbrâ rơnáu ƀă mâu tơdroăng ki hbrâ ví ƀă têa kroăng tâk đik, tơhnah tơhnâp ngo.

Tơdrêng ƀă kơpong tơdé tơnêi têa, mâu kong pơlê tung kơpong Tây Nguyên xuân hiăng tơbleăng mâu tơdroăng pêi pro hbrâ ví khía rôh má 4 plong mot.  Kơxê lơ 26/9, Khu kăn đảng ủy kong pơlê Kon Tum tơkŭm hôp tơdrêng ƀă mâu râ đảng ủy, mâu kăn ing râ cheăm vâ môi tuăn troăng rơhlâ hnê mơhno tơdroăng cheăng hbrâ mơdât, ví trâm xía vâ xua khí plong mot. Ing mê, khu kăn đảng ủy kong pơlê hiăng môi tuăn ƀă tơdroăng tối thế dêi khu xiâm ngăn hnê hriâm ƀă hnê mơjiâng tuăn ngôa rơkê ăm hok tro pơtê hriâm ing hâi lơ 27/9 troh drêng tối tơbleăng nếo.

Kon Tum hôp tơdrêng hbrâ, mơdât, hbrâ ví xía vâ khía mơhot rôh má 4

Vi ƀan kong pơlê Kon Tum hiăng mơjiâng 3 khu pêi pro séa ngăn, hnê mơhno hbrâ mơdât khí mơhot a mâu tơring ki nhôm kô tơ’lêi tơdjâk ó, mê cho: Kon Plông, Kon Rẫy, Ngọc Hồi, Đăk Tô, Đăk Hà, Tu Mơ Rông ƀă Đăk Glei.  Khu kăn đảng ủy kong pơlê Kon Tum pơkâ thế rêm râ đảng ủy, mâu kăn ing kong pơlê  troh a tơring cheăm thế mơ-eăm xĕn kuăn pơlê lo ing mâu kơ pong ki nhông tơnêi kô tơhnâp, têa rơlêa; pôi tá ăm kuăn pơlê prôk tơkâ luâ a mâu kơpong  ki rơ iô tung pơla kong mêi têa kân lân lu.

VOV.VN

Katarina Nga tơplôu ƀă tơbleăng