A kơpong peăng Tơdế tơnêi têa – Tây Nguyên, mâu long têa hngêi kơmăi on tơhrik kân dế ôh tá bê têa, mơ’no on tơhrik tot tơdế rá. Kŏng ti xiâm On tơhrik peăng Tơdế tơnêi têa dế pêi pro hên troăng tơniăn bê on tơhrik, tơdrêng amê mơhnhôk kuăn pơlê kơdroh xúa on tơhrik a mâu chôu ki hên ngế xúa. Kŏng ti xiâm On tơhrik peăng Tơdế tơnêi têa mơnhên ivá on tơhrik ki têi cho lối 3.500 MW a hâi lơ 21/4, tâk 10,2% tâng pơchông ƀă roh kố hơnăm 2022.

Tiô tối hdrối tung mâu hâi kong tô khăng khoăng la ngiâ, ivá ki têi pơtối tâk. Tơdrêng amê, kơxô̆ on tơhrik ing mâu long têa hngêi kơmăi on tơhrik kơpong peăng Tơdế  tơnêi têa – Tây Nguyên châ dâng 38%. Tâng tơdroăng kong tô khăng khoăng râ ó tung rơdâ mê tơdroăng mơ’no ăm on tơhrik thăm trâm pá.

Drêng ai tơdroăng kố, Kŏng ti xiâm on tơhrik peăng Tơdế tơnêi têa pơkâ mâu Kŏng ti on tơhrik rĕng mơjiâng ƀă pêi pro troăng tơniăn xing xoăng on tơhrik rơnó khăng khoăng; xing xoăng chôu tơpâ on tơhrik tơtro, thăm xúa kŏng ngê̆ rơnêu on tơhrik vâ kơdroh ki tot mơ’no on tơhrik. Kŏng ti xiâm on tơhrik peăng Tơdế tơnêi têa pơchân tối kuăn pơlê xúa on tơhrik kơdĭng, ki má lối a mâu chôu ki hên ngế xúa môi tiah kơhâi dế lơ kơmăng.