Tiô tối tơbleăng dêi Khu xiâm ngăn 'na chiâk deăng ƀă Hyôh kong prâi, tung kơxô̆ 38 tơdroăng pơkâ thế dêi EC, ai 31 tơdroăng pơkâ thế hiăng pêi pro klêi, 5 tơdroăng pơkâ thế dế pơtối châ pêi klêi tiô troăng hơlâ ƀă 2 tơdroăng pơkâ thế kal tơpui tơno, mơnhên tơ'nôm vâ rak tơniăn tơtro ƀă tơdroăng ki ai khât dêi luât Việt Nam. Troh tâi khế 9, lâp tơnêi têa ai lối 80.000 toăng tuk tơnăng ká châ chêh ‘mot inâi tung kơmăi cheăng tơnăng ká dêi tơnêi têa. Plong tuk ki hiăng krâ kế ki séa ngăn châ vâ chê 99%.

Mơgêi rôh hôp, Phŏ Ngế pro xiâm hnê ngăn tơnêi têa pơkâ thế sap ing nôkố troh mơ’nui hơnăm pêi pro kơtăng “5 ôh” tung hbrâ mơdât tơnăng ká tiô pơkâ IUU: pôi tá ăm ai plong tuk tơnăng tro kong têa ê rup râng; pôi tá ăm plong ki ôh tá ai tŭm tơdroăng chiâng lăm tơnăng; pôi tá ăm pro xôi VMS lối ton; pôi tá ăm mâu ká xi xŏng ôh tá ai tŭm tơdroăng vâ tăng ‘nâi xiâm kối; pôi tá ăm ai tơdroăng ki pơhlêh chêh tối ôh tá tro tâng vâ pơchông ƀă tơdroăng ki chêh ‘măn, hồ sơ ƀă ki ai khât.

Mâu kong pơlê athế pơkuâ ngăn kơtăng mâu plong tuk, rak tơniăn mâu tơdroăng ki chêh tối tơdrăng, tơbleăng, chiâng vâ châ hlo; ‘mâi mơnhông vâ mâu tơdroăng ki u ối trâm, pôi tá ăm môi kong pơlê ki lâi tá jâi tro tơdjâk troh ivá mơ-eăm tơdjuôm tung tơdroăng ki lêi tah ‘Theh trĭng” dêi EC.