Malối, leh pơxiâm bro tơdroăng tơkêa kố châ tơkŭm po tơdjuôm ƀă ‘no tơdrêng ing troăng hyôh Internet ƀă 2 tơdroăng tơkêa ki ê, cho tơdroăng tơkêa bro troăng kân Biên Hòa – Vũng Tàu ƀă tơdroăng tơkêa Troăng Ví 3, Pơlê kong kân Hồ Chí Minh.

Tơdrêng ƀă mâu Kăn dêi mâu khu xiâm, kơvâ cheăng 2 to kong pơlê Dak Lak, Khánh Hòa hên ngế kuăn pơlê a cheăm hơngế hơngo Čư̆ Drăm, tơring Krông Bông ƀă Čư̆ San, kong pơlê Dak Lak xuân troh hlo ƀă mâ chôu phut pơxiâm mơjiâng pro tơmeăm khoăng ton hơnăm. Ngoh Trần Hữu Thới, ối a cheăm Čư̆  Drăm, tơring Krông Bông, kong pơlê Dak Lak, tối:

“Á hlo tro ‘nâng. Tơmeăm khoăng mê vâ tối cho troăng ki xiâm. Tơdroăng ki ê nếo cho pro ăm rĕng kêi iâ, mơni la ngiâ kô ah kô mơnhông rơdêi ‘na cheăng kâ’’.

Tơdroăng tơkêa bro mơjiâng pro troăng kân tơdrăng lĕm sap ing Khánh Hòa - Ƀuôn Ma Thuột ai tíu ki xiâm tơdjêp a pơla troăng kân 26 ƀă troăng kân kơxô̆ 1, kơpong Nam Vân Phong, pơlê kong krâm Ninh Hòa, kong pơlê Khánh Hòa; tíu tơdjêp ƀă troăng kân Hồ Chí Minh ví peăng mâ hâi Lo pơlê kong kơdrâm Ƀuôn Ma Thuột, kong pơlê Dak Lak.

Tâi tâng ki xŏn dêi troăng mê vâ chê 118 km, liăn ‘no mơjiâng pro lối 21.900 rơtal liăn. Tung mê kong pơlê Khánh Hòa pro xiâm ‘no mơjiâng pro 32km, liăn pro 5.632 rơtal liăn; Khu xiâm ngăn troăng prôk pro xiâm ‘no liăn pro 37,5km, liăn pro 9.818 rơtal liăn,  ki u ối kong pơlê Dak Lak pro xiâm ‘no liăn pro. Khế hơnăm pro troăng mê sap khế 6/2023  troh hơnăm 2030 kô klêi tâi tâng ƀă kô chiâng xúa ăm rơxế kơtâu.

Pôa Phạm Ngọc Nghị, Kăn hnê ngăn Vi ƀan kong pơlê Dak Lak ăm ‘nâi, kong pơlê hiăng tơkŭm hnê mơhno sap apoăng ai tơdroăng  tơkêa bro châ kĭ pro ƀă pơxiâm ăm gu tơbăng tơnêi, xĕn hngêi trăng, ƀă ‘nâi nhên ki mơ-eăm kal kí dêi kong pơlê.

“ ‘Na hnoăng cheăng dêi tơná, kong pơlê Dak Lak tơhrâ ƀă Ngế pro xiâm hnê ngăn Chin phuh kô pơtối tơmâng pơkuâ hnê mơhno dêi Khu rak ngăn tơdroăng tơkêa bro, rơtế ƀă kơ koan, mâu tíu pêi cheăng mơdêk  tơdroăng ‘mâi xĕn hngêi trăng, gu tơbăng tơnêi ki u ối, pơcháu tâi 100% tíu vâ mơjâng pro ƀă mâu tơdroăng ki kal ăm tíu pêi cheăng ki pro hdrối hâi lơ 31/12/2023; pro tơ’lêi hlâu má môi vâ mâu tíu pêi pro, hnê tối, pêi tơdroăng tơkêa mê vâ tơ ƀrê’’.

Drêng hiăng pro klêi, troăng kân tơdrăng lĕm sap ing Khánh Hòa  troh Ƀuôn Ma Thuột pơla rôh má 1 kô veăng ‘no hnoăng pro klêi troăng ki mơgăn tơdjêp ƀă kơpong Tây Nguyên ƀă drô hbêa Nam Trung bộ, tơdjêp ƀă troă ki tơdrăng tê (troăng kân tơdrăng lĕm sap Peăng Kơnhŏng troh peăng Hdroh pa mâ hâi Lo, troăng kân Hồ Chí Minh, troăng kân kơxô̆ 1, troăng kân kĭng têa kơxĭ), pơtối rak vế pêi pro ai pơxúa mâu tơdroăng tơkêa bro ƀă hiăng dế ‘no liăn pro, ai tiô tơdroăng púi vâ ăm rơxế kơtâu; pro tíu ki xiâm vâ mơnhông mơdêk.

Troăng prôk mê xuân veăng ‘no hnoăng tơbriât cheăng, pro xiâm tơrŭm, mơdêk tơrŭm cheăng ƀă dêi rơpó ƀă mơnhông kơpong, veăng rak tơniăn kring gạk, ‘na cheăng lêng, kơdroh kơklêa, xăm kơtiê, chôa lâng pêi klêi mâu tơdroăng pơkâ, mơnhông cheăng kâ-rêh ối tiô Pơkâ hneăng hôp má 13 dêi Đảng. Ƀă kuăn pơlê a mâu pơlê cheăm hngế hngo dêi kong pơlê Dak Lak ƀă kơpong kong ngo peăng mâhâi lu pa Hdroh kong pơlê Khánh Hòa, tơdroăng pro troăng kân sap Ƀuôn Ma Thuột troh Khánh Hòa cho troăng kân mơjiâng pro ton hơnăm, cho tơdroăng ki tơmâng kân khât dêi Đảng, Chin phuh, tơkâ luâ tơdroăng púi vâ dêi kuăn pơlê.

Tơdrêng ƀă troăng kân tơdrăng lĕm sap Khánh Hòa troh Buôn Ma Thuột, rôh kố ối 2 tơdroăng tơkêa pro ki ê xuân châ mơjiâng, mê cho troăng kân tơdrăng lĕm  sap Biên Hòa troh Vũng Tàu ƀă tơdroăng Tơkêa bro troăng kân pá kĭng 3, Pơlê kong kân Hồ Chí Minh. Kố cho 3 tơdroăng tơkêa bro ki kal dêi tơnêi têa kơvâ ngăn troăng prôk tâi tâng ki xŏn dêi 3 to troăng ai 247km; tâi tâng kơxô̆ liăn ‘no mơjiâng pro lối 115 rơpâu rơtal liăn. 

Tối tơbleăng a rôh leh, teăng mâ Chin phuh, pôa Phạm Minh Chính, Ngế pro xiâm hnê ngăn tơnêi têa tối nhên, hneăng hôp Đảng tung lâp tơnêi têa rôh má 13 hiăng pơtối pơkâ mơjiâng troăng prôk tơdrêng cho môi tung pái tơdroăng ki tơƀrê, tung mê kum ahdrối mơnhông mơdêk pro tơmeăm khoăng tơnêi têa ‘na troăng prôk. Ngế pro xiâm hnê ngăn tơnêi têa tối nhên, tơdroăng ki kal dêi 3 tơdroăng tơkêa bro:

“Ki ma lối  dêi 3 tơdroăng tơkêa pơxiâm mơjiâng pro hâi kố cho mâu tơdroăng tơkêa bro châ xúa luât pơkâ krê ai ‘na mơdêk rơdêi xing xoăng râ hnoăng pơkuâ, ing mê, pơcháu ăm kong pơlê pro kơ koan ki xiâm pêi tơdroăng tơkêa bro; xúa luât pơkâ mơhnhôk tăng liăn vâ pêi tơdroăng tơkêa bro pơla liăn ngân xiâm tơnêi têa ƀă kong pơlê; xúa hnê mơhno tíu pro vâ rah xo khu mơjiâng pro vâ rah xêh khu ki lâi pêi tơdroăng tơkêa bro, ing mêm vâ pơkâ iâ hâi khế hbrâ vâ tơbleăng tơdroăng tơkêa bro.

3 luât pơkâ mê xuân hiăng pơtối pêi pro ai pơxúa, mơhno ki tro ‘ló dêi Đảng, Tơnêi têa tung tơdroăng pơkâ luât ki nếo vâ pêi klêi tơdroăng pơkâ mơnhông mơdêk tâi tâng ‘na mơjiâng tơmeăm khoăng troăng prôk tiô Pơkâ dêi Đảng’’.

Ki khât ăm hlo, troăng prôk rơxế kơtâu tối tơdjuôm ƀă troăng kân tơdrăng lĕm, tơriah tơƀai, kơno tuk tối krê pro pơxúa ăm hlo ‘na tơdroăng vâ mơnhông cheăng kâ, rêh ối. Troăng prôk lĕm troh dâng lâi kô po troăng mơnhông mơdêk nếo ‘na cheăng kâ - rêh ối ăm kuăn pơlê troh dâng mê, hên kơphô̆, kơpong hngêi kơmăi, tíu mơdró kâ, ôm hyô châ mơjiâng pro, tơnêi châ pêi ai pơxúa.