Tung rôh lăm pôu pêi cheăng a Kŏng hòa Czëch, pôa Bùi Thanh Sơn, Ngế xiâm tơpui kâ hiăng ai rôh trâm mâ mâu ngế teăng mâ mâu khu mơngế Việt Năm a kong têa Czëch ƀă châu Âu. Tơbleăng a rôh pêi cheăng, pôa Bùi Thanh Sơn, Ngế xiâm tơpui kâ tối, mơhé tro tơdjâk ing pơreăng tâ tú la sap klêi kơ’nâi kĭ Tơhrâ Tê mơdró tơniăn pơla Việt Nam- EU (EVFTA) xêt khât, tơdroăng cheăng tê mơdró pơla Việt Nam ƀă Czëch hlo tơƀrê ‘nâng, rêm hơnăm lối 15% , tơrŭm cheăng pơla péa  tơnêi têa châ po rơdâ hên tơdroăng.

Tơnêi têa Việt Nam đi đo nhoăm mơngế Việt Nam a kong têa ê cho tung khu ôh tá chiâng tơklâ dêi hdroâng kuăn ngo. Ing mê, ai hên troăng pơ’lêh tơtro ‘na hlá mơ-éa luât ƀă mơngế Việt Nam a kong têa ê; Đảng ƀă tơnêi têa hiăng ƀă dế pơtối tơmâng, veăng kum, kơhnâ pêi cheăng ƀă khu tơrŭm vâ châ tơmâng ƀă kuăn pơlê mơngế Việt Nam ki  rêh ối a kong têa ê.