Peăng xêi hâi lơ 12/5, pôa Bùi Thanh Sơn, Ngế xiâm tơpui kâ rơtế ƀă khu kăn hiăng pôu pêi cheăng ƀă Vi ƀan hnê ngăn kong pơlê Gia Lai. Mâu khế apoăng hơnăm 2023, tâi tâng kơxô̆ liăn ki châ xo a kong pơlê Gia Lai châ 2 rơpâu rơtal liăn. Tâi tâng kơlo ki tê ‘ngré ƀă tê mơdró kâ tung 4 khế châ lối 30 rơpâu rơtal liăn, tâk lối 25% tâng vâ pơchông ƀă rơnó kố hơnăm nah.

Kơlo liăn ki pêi cheăng kâ mơ’no tê kế tơmeăm tung 4 khế mơni châ 310 rơtuh USD, tung mê, tơmeăm ki tê mơ’no hên cho kơphế, kơxu, châ tê mơ’no hên tá tơdroăng ki dâi lĕm, tá ki hên. Hơnăm kố, Gia Lai châ pơcháu kô mơgêi mơnhên tâi tâng kơxô̆ liăn ki mơ’no pêi pro mâu tơdroăng tơdjuôm châ lối 4 rơpâu rơtal liăn, riân troh nôkố bu châ mơ’no ăm mung châ 335 rơtal liăn.

Xông tơpui a roh pêi cheăng, pôa Bùi Thanh Sơn  hiăng mơnê tơdroăng ki hiăng châ chiâng pêi pro, pêi pro tơƀrê ki kong pơlê Gia Lai hiăng ai tung hên mâu kơvâ cheăng ƀă pơtối pơchân kong pơlê thăm mơdêk hnoăng ki hiăng rơkê chiâng mê, thăm mơdêk tơrŭm ƀă lâp plâi tơnêi vâ po rơdâ tơdroăng tê mơ’no kế tơmeăm.

‘Na tơdroăng ăm mung liăn ngân a mâu tơdroăng tơkêa bro, pôa Bùi Thanh Sơn tối ăm ‘nâi kơlo ki ăm mung vâ pêi pro tơdroăng cheăng tơdjuôm dêi kong pơlê Gia Lai châ ngăn ối hrá, xua mê, kong pơlê kal ai troăng hơlâ vâ tŏng kum mơdêk; mâu kơvâ cheăng ki mê.