VOV4.XơĐăng - Klăng roh lăm pôu pêi cheăng a kong têa Indonesia ƀă rơtế pơkuâ Hneăng hôp roh má 4 Viƀan tơrŭm cheăng pơla péa pâ Việt Nam – Indonesia dó inâi JCBC-4, kơxo hâi lơ 20/7/2022, pôa Bùi Thanh Sơn, Ngế xiâm tơpui kâ hiăng ai roh tơdah tơpui tơno ƀă pôa Joko Widodo, Kăn xiâm pơkuâ kong têa Indonesia a Tíu pêi cheăng Kăn xiâm pơkuâ kong têa Indonesia.

Pôa Bùi Thanh Sơn mơnhên troăng tơmiât môi tuăn sap ing a ko troh tá tui lui dêi Việt Nam đi đo nhuô̆m ƀă pói vâ mơnhông mơdêk tâ mê nếo tơrŭm cheăng ton xŏn ƀă Indonesia; tối loi tơngah Indonesia kô pôu râng châ tơƀrê hnoăng cheăng Kăn xiâm hnê ngăn G-20, pêi pro châ tơƀrê ‘’Troăng tơmiât pêi hơngế Indonesia 2045’’, chiâng kong têa mơnhông mơdêk drêng leh tơbâ 100 hơnăm mơjiâng tơnêi têa a hơnăm 2045. Pôa Bùi Thanh Sơn tối pói vâ Kăn xiâm pơkuâ kong têa Indonesia môi tuăn péa pâ thăm tơpui tơno, trâm mâ khu râ kăn xiâm ƀă mâu râ; kơdroh tơdroăng ki mơdât ƀă thăm mơnhông tơtêk tê mơdró tiô troăng tơdâng tâ.

A Sa Ly tơplôu ƀă tơbleăng