Tiô rơkong krếo thế dêi ngế xiâm pơkuâ châu Âu prếi jâ Catherine Colonna, Ngế xiâm tơpui kâ kong têa Pơhlăng, Pôa Bùi Thanh Sơn, Ngế xiâm tơpui kâ Việt Nam hiăng pôu pêi cheăng a Kong têa Pơhlăng sap ing hâi lơ 5 – 6/6/2023. A Rôh tơpui tơno a kơxo lơ 5/6, pôa Bùi Thanh Sơn tối nhên, Việt Nam đi đo ngăn nhuô̆m tơrŭm cheăng ƀă Pơhlăng, kong têa tơrŭm cheăng ki kal dêi EU, kong têa tơrŭm cheăng tung la ngiâ dêi Việt Nam ƀă hên tơdroăng tơrŭm ‘na tơdroăng roh ton nah, mơhno túa lĕm tro, kuăn mơngế.

Pôa Bùi Thanh Sơn pâ thế Chin phuh Pơhlăng môi tuăn, pâ thế Kuô̆k hô̆i Pơhlăng rĕng kĭ tơkêa Rak vế ‘no liăn cheăng Việt Nam – EU (EVIPA), pâ thế Vi ƀan châu Âu (EC) rĕng tah lôi mâu theh trĭng (IUU) dêi EC ƀă mâu ká xi xŏng Việt Nam. Péa Ngế xiâm tơpui kâ xuân hiăng tơpui tơno mâu tơdroăng tung kơpong, a kong têa ê ki péa pâ rơtế vâ ‘nâi plĕng, tối nhên pơtối tơrŭm krá tơniăn ƀă môi tuăn tŏng kum dêi rơpó a mâu rôh tơkŭm po hneăng hôp ki hên kơvâ cheăng, malối cho Khu lâp kong têa ƀă pâ thế thăm mơdêk tơdroăng tơrŭm cheăng tung la ngiâ pơla ASEAN – EU.