A rôh tơdah, pôa Đặng Hoàng Giang, Phŏ ngế xiâm tơpui kâ tối nhên Việt Nam, ƀă hnoăng cheăng cho tơnêi têa xing xoăng tơrŭm cheăng ASEAN – Ănglê pơla hơnăm 2024 – 2027, kô pơtối tơrŭm krá tơniăn ƀă Ănglê vâ pơkâ tơmiât troh tơrŭm cheăng ASEAN – Ănglê mơnhông rơdêi, tŭm têk, ton xŏn ƀă tơrŭm cheăng tung la ngiâ, tơtro ƀă tơdroăng rơhêng vâ tơrŭm cheăng dêi péa pâ hmâ ƀă tơdroăng pơkâ thế dêi tơdroăng nếo nôkố. Việt Nam xuân dế xing xoăng, mơdêk mơjiâng pro Túa pêi pro ASEAN – Ănglê pơla hơnăm 2027 – 2031, tơkŭm tung mâu kơvâ tơrŭm cheăng ki kal châ kơjo môi tiah cheăng kâ, liăn ngân, pơhlêh xúa mâu tơdroăng ki lĕm tro, mơnhông krá tơniăn, hbrâ ví ƀă kong prâi pro pơhlêh, pơhlêh nếo tơmiât rơkê, tơrŭm cheăng a têa kơxĭ ƀă hên ki ê.

‘Na tơrŭm cheăng pơla péa pâ, pôa Đặng Hoàng Giang mơnhên tối khât tơdroăng tŏng gum dêi Ănglê ăm Việt Nam tung mơjiâng Tíu xiâm liăn ngân lâp plâi tơnêi, mơdêk tơrŭm tung mâu kơvâ cheăng; pơkâ thế Ănglê tối tơbleăng ki rơkê plĕng ‘na pơhlêh on tơhrik krúa.