Drêng troh hâi Tĭng kân Pâ Xeăng chu chiâng kuăn mơngế hơnăm 2022, kơxê lơ 21/12, pôa Đỗ Văn Chiến, kăn pơkuâ hnê ngăn tung khu xiâm Đảng, Kăn hnê ngăn Vi ƀan Xiâm Măt trâ̆n Tơnêi têa Việt Nam pơkuâ djâ khu kăn ki pêi dêi hnoăng cheăng dêi Tơnêi têa, Vi ƀan xiâm Măt trăn Tơnêi têa Việt Nam ƀă kăn pơkuâ kong pơlê Kon Tum hiăng troh pôu, rơkâu hâi Tĭng kân Noel a Tòa Giám mục Giáo phận Kon Tum. Teăng mâ kăn pơkuâ Đảng, Tơnêi têa, pôa Đỗ Văn Chiến pơtroh rơkong rơkâu hâi Tĭng kân Pâ Xeăng chu chiâng kuăn mơngế troh ƀok xối kân chính tòa Giáo phận Kon Tum Nguyễn Hùng Vị, mâu ƀok xối, mâu khu ki hriâm vâ bro ƀok xối, jâ chĭng ƀă kuăn pơlê tiô khôp tơdah hâi tĭng kân Pa Xeăng chu chiâng kuăn mơngế phâi tơtôu, hơniâp ro, châ hên tơdroăng ki ƀlêi chiâng ƀă châ xo hên Graxia pâ Xeăng.

Tơpui ƀă ƀok xối kân chính tòa Giáo phận Kon Tum ƀok xối kân Nguyễn Hùng Vị, teăng mâ mâu ƀok xối, jâ chĭng ƀă vâi krâ nhŏng o tiô khôp, pôa Đỗ Văn Chiến tối nhên, maluâ châ hên mâu tơdroăng ki ƀlêi chiâng tung mơnhông mơdêk cheăng kâ rêh ối, tơdroăng rêh ối rêm tơdroăng hơniâp lĕm la hơnăm 2023 tung tơdroăng trâm tơdjuôm dêi lâp plâi tơnêi xuân ôh tá ‘nâi hdrối cho tơnêi têa pin kô ai tơdroăng xơpá, tơdroăng mê pâ thế ai tơdroăng ki môi hiâm mơno dêi tâi tâng Đảng, tâi tâng khu lêng ƀă tâi tâng kuăn pơlê.