Hneăng hôp tơbleăng 85 ngế kăn Hô̆i đong hnê ngăn kong pơlê châ kuăn pơlê pôk, hlối tơkŭm po rôh tâ phĭu pôk inâi kăn pơkuâ. Klêi kơ’nâi mê, pôa Rah Lan Chung, Phŏ pơkuâ ngăn Đảng kong pơlê Gia Lai châ vêh pôk pro kăn hnê ngăn Hô̆i đong kong pơlê; pôa Trương Văn Đạt prế jâ Huỳnh Thúy Vân châ pôk pro Phŏ kăn hnê ngăn Hô̆i đong kong pơlê.

Tơpui a hneăng hôp, pôa Thái Đại Ngọc, Kăn pơkuâ hnê ngăn Đảng Gia Lai tối nhên pơla hơnăm 2025 – 2030, Gia Lai pơkâ pêi thăm mơnhông GRDP 10% troh 10,5%/hơnăm, chiâng tíu tơdjêp cheăng tung la ngiâ pơla Tây Nguyên pa hdroh Tơdế Tơnêi têa ƀă mâu kong pơlê ki xiâm ‘na cheăng kâ tung kơpong. Vâ pêi pro châ tơdroăng pơkâ pêi kố, Hô̆i đong hnê ngăn kong pơlê Gia Lai kal pơtối pơhlêh nếo, mơdêk ki rơkê dêi mâu hneăng hôp; tơkŭm pơkâ troăng hơlâ tŏng gum ăm mơnhông tơƀrê ‘na tơ’mot ‘no liăn cheăng, mơjiâng pro troăng klông, pơhlêh kơxô̆ ƀă khoa hok – kong ngê̆.